El Mercáu Tradicional de San Isidro, Nacho Vegas y Vero Rubio completen l’axenda del fin de selmana

Amás de la #RomeríaEnLABoral -cola participación de Rodrigo Cuevas, Les Pites, DJ Fañagüeta, DJ La Güeriata y DJ La Viuda de Angelín– y del conciertu despidida de Misiva en Grau d’esti vienres 17 de mayu, l’axenda vien enllena de música pal fin de selmana. Llanera acueye’l Mercáu Tradicional de San Isidro nel que, ente otres munches actividaes, van actuar dellos coros, l’A.C La Madreña, Ximielga la Saya, Cerezal, la Banda Gaites Fonte Fuécara y va haber un festival de Canción Asturiana. Per otru llau, el sábadu Nacho Vegas ufre un recital nel Muséu de Belles Artes d’Asturies dientro del ciclu Cuadros Cantados y Vero Rubio continúa la xira Vou en Villaviciosa.

La programación musical del Mercáu Tradicional de San Isidro de Llanera arranca’l vienres 17 nel Parque Corquera (Posada) a les 20h coles actuaciones de les corales Coro Samartino de Vega de Poja (Siero) y Coral Polifónica de Llanera.. Al día siguiente l’eventu enllénase de cultura tradicional col pasacáis de l’A.C La Madreña (11.30h) y les actuaciones d’esta mesma agrupación y de Ximielga la Saya a les 17.30h. Pa rematar la xornada, la banda folk-pop Cerezal ufre un conciertu a les 20.30h. El zarru musical d’esta cita pónenla’l domingu un desfile de la Banda Gaites Fonte Fuécara (11.30h) y un Festival de la Canción Asturiana a les 13h con Liliana Castañón, Andrés Cueli, Julio Mallada, Águeda Riera y Lucía Rojo. A la gaita va tar Iván Tomás y el presentador ye Julio César Baragaño.

D’otra banda, el cantautor xixonés Nacho Vegas va dar el sábadu a les 12.30h n’Uviéu un conciertu perespecial. Nesta ocasión va tocar dientro de Cuadros Cantados actividá qu’entama’l Muséu de Belles Artes d’Asturies pa festexar el Día Internacional de los Museos. Na actuación, Vegas va interpretar seis cantares nos que la so música va venceyase con dalgunes de les obres pertenecientes a la colección d’esti muséu.

Vero Rubio en Villaviciosa

L’axenda del fin de selmana complétase con un conciertu de Vero Rubio, ganadora del XV Premiu Camaretá al Meyor Cantar con “Dixo miou padre“, dientro del circuitu Autores nel Camín qu’entama la Dirección Xeneral de Política Llingüística. La multiinstrumentista actúa’l sábadu 18 a les 19h nel Centru Cultural Clarín de Villaviciosa, continuando d’esta manera la xira Vou qu’entamó’l pasáu mes d’abril.