Yá ta en toles plataformes musicales ‘Nauta‘, l’avance del que va ser el sestu trabayu de Fontoria, Madremar, y que’l grupu de folk progresivu va asoleyar ente xineru y febreru de 2026. «‘Nauta’ entama con una intro instrumental qu’enllaza con esti cantar que surde seliquino y que va medrando a traviés d’una lletra que contien señaldá, rabia, y aceptación final pola parte del personaxe», desplica Maxi Areñes, cabezaleru del proyectu.
«El tema fala de les reflexones al rodiu la vida d’un Ulises actual, vieyu y cansáu, que ye consciente de que yá entama’l camín que lu lleva al so fin», comenta Areñes en rellación a un discu que, como sorraya, «bien podía titulase La Odisea, porque ta enllenu de referencies a la obra d’Homero, sobre manera nel instrumental que da nome al trabayu«. «Nesti instrumental de 50 minutos quixi reflexar la mio idega de la mar, como una madre a vegaes dulciquina y a vegaes terrible, con un poder inimaxinable», añade.
El cabezaleru de Fontoria tamién desplica que Madremar «tamién va cuntar col pieslle de la triloxía ‘Eolo’, otru instrumental de 8 minutos, y pa pesllar el trabayu ta ‘Nauta’, esti tema que sal agora como cenciellu». El trabayu ta grabáu, como ye vezu, nel estudiu que Maxi Areñes tien na so casa.
«Madremar va ser un discu especial, porque la mio idega ye que nel 2026 salga esti sestu trabayu y a finales d’esi añu saldrá otru más nel que ya voi grabando cosuques. Va ser l’entamu despedida d’esti proyectu» diz Maxi Areñes en rellación al so grupu qu’en 2027 va cumplir 10 años. «Pa esa fecha voi intentar pesllar esta andadura con un discu de música celta que sedría l’octavu y que va poner el puntu final al proyectu«, conclúi’l cabezaleru de la formación de folk progresivu.
Suscríbite a les nuestres novedaes
