El proyectu Al Son del Cantar publica nuevu discu y anuncia gala de presentación

Doce artistes grabaron les canciones ellaboraes pela reciella de los centros participantes. La gala de presentación será el 6 de xunu en Corvera.

Llanzamientos

Acaba de publicase’l nuevu discu d´Al Son del Cantar, un proyectu d’innovación educativa nel que participa alumnáu de Llingua Asturiana y Eonaviego del últimu ciclu de primaria y los dos primeros cursos d’ESO. Esta iniciativa llévase a cabu a traviés de la convocatoria d’un concursu nel cual dellos centros educativos asturianos unvíen canciones creaes pol alumnáu, fomentando’l desarrollu creativu, musical y llingüísticu nes aules. La propuesta organízase ente los Servicios de Normalización Llingüística, la Conseyería de Cultura, Política Llingüística y Deporte y la Conseyería d’Educación

Esti añu recibiéronse un total de 37 canciones, cola participación de Cangas del Narcea, Ḷḷena, Castrillón, Carreño, Gozón, Nava, Grau, Villaviciosa y Cuaña. D’eses propuestes, escoyéronse un total de 12 que foron iguaes y grabaes por grupos profesionales de la escena asturiana, con variedá de formaciones y estilos, pasando pol folk, el rock, el punk, el reggae o l’indie. Esta ye la llista de temes y artistes que participaron n’esta edición, xunto colos centros que ficieron les canciones:

«Colores», del CP Castillo Gauzón (Castrillón), interpretáu pola cantautora Tania Pereira
«As tradicióis», del CP Darío Freán Barreira (Cuaña), interpretáu pol conxuntu Tringuilintainas
«El ramu del CRA Río Cibea», del CRA Río Cibea (Cangas del Narcea), interpretáu pol grupu de percusión tradicional y voz 6 Riales
«La pita ḷḷueza», del CRA Lena (Ḷḷena), interpretáu pol grupu de punk-rock Ochobre
«Yá llegan los aguilandeiros», del CP Virgen del Fresno (Grau), interpretáu pol artista Ferla Megía
«El profesor llocu», del CP Antón de Marirreguera (Carreño), interpretáu por Los Berrones
«El cabu Peñes», del IES Cristo del Socorro (Gozón), interpretáu pol tríu folk Draque
«Les cuatro estaciones», del CP San Bartolomé (Nava), interpretáu pol grupu de folk Cerezal
«El patiu», del CP Les Mariñes (Villaviciosa), interpretáu pol grupu de rock esperimental Melandru
«Patios divertíos», del CP Vital Aza (La Pola Ḷḷena), interpretáu pola cantante y compositora Mapi Quintana
«Xuntes, xuntos», del CP Jesús Neira (La Pola Ḷḷena), interpretáu pol cantante reggae Fred Warrior
«El manguán», del CP Antón de Marirreguera (Carreño), interpretáu pol grupu de folk-rock Espantäyu

El trabayu acompáñase d’una gala de presentación que va cellebrase’l día 6 de xunu en Corvera, na que tarán presentes 8 de los artistes participantes y l’alumnáu ganador de cada conceyu. La gala va ser grabada pola Televisión del Principáu d’Asturies, pa su posterior emisión.

Amás, el CD va distribuyise ente los centros educativos públicos d’Asturies, y el conteníu va tar disponible online pa tol el públicu a traviés de les plataformes Youtube, Spotify, Amazon Music, Tidal, Apple Music, Soundcloud, Deezer ya iTunes, onde tamién tan disponibles los trabayos correspondientes a les ediciones anteriores del concursu: El mio cantar (2019) y Al son del cantar (2022).