La banda punk-rock Asturtralla yá tien un discu na cai depués de 27 años

Asturtralla ye ún de los primeros grupos qu’hubo de punk-rock n’asturianu. Entamaron a ensayar en 1994 n’Avilés, grabaron un par de maquetes y participaron nel compilatoriu ‘Sáca-yos la Llingua‘ (1997, L’Aguañaz) colos cantares “Utopía Ciencia Ficción” y “Na Zona Muerta”. Cuasi tres décades depués, Xelu Estébanez -fundador de la formación-, decidió cola ayuda de Panfle, Roque III, Santi Gilu, Asur_gg y Xurde Areces, grabar un EP que yá ta a la venta en CD y en toles plataformes dixitales.

«L’EP son cuatro versiones de canciones qu’entamaron a facese va 25 años, pero col soníu d’agora y con unes lletres dalgo actualizaes, pero poco, porque les coses tán más o menos igual que fai 24 años», asina desplica Xelu Estébanez lo que recueye esti trabayu. Los cantares “Asturies”, “Insumisión”, “Oficialidá” y “Fame” dan forma a un EP que’l grupu decidió grabar «de casualidá“. «Dióme por da-y un toque a Panfle pa ver si quería facer una versión d’ún de los cantares vieyos, al final ficimos cuatro y les grabamos pa que queden pa la posteridá, pa les nueves xeneraciones», comenta Estébanez añadiendo que de tol material que grabaron va dos décades «namás quedaben de recuerdu les de “Utopía” y “Na Zona Muerta” con un soníu mediu decente, porque les maquetes tienen un soníu bastante desastrosu».

Alrodiu los planes de futuru, l’únicu componente de la formación orixinal d’Asturtralla avanza que siguirán grabando cantares pal 2022 y que «nunca se sabe» si van volver a tocar en directo. Con esti trabayu, continúen depués de dos décades un camín de punk-rock n’asturianu y de denuncia social; un exemplu d’esto últimu ye que ficieron coincidir la publicación del EP nes plataformes dixitales col 12 d’ochobre –Día de la Hispanidá– , y que güei 22 d’ochobre -día de los Premios Princesa d’Asturies– lu asoleyen en formatu físicu.

Discu yá a la venta en musicasturiana.com y en plataformes dixitales

Comprar más discos de rock n’asturianu na tienda online