Dixebra escomienza la grabación del so discu nuevu

Esti sábadu pasáu Dixebra entraba nos Estudios Tutu de Los Campos (Corvera) pa grabar lo que va ser el so próximu y esperáu trabayu discográficu. El mesmu retrasóse por cuenta del andanciu, pero una vez completaes les xeres de composición, arreglos de los temes y preproducción va ser una realidá a nun tardar. La grabación y la producción musical vuelve a tar en manes del so productor avezáu, Sergio Rodríguez, que tien per delantre’l rexistru y mezcla d’una ventena de pieces de los estilos más variaos. Nesti sen, como ye costume nos trabayos de la banda avilesina, van dexase sentir composiciones d’aire distintu ente sí: rock, reggae, ska, folk, funk, metal… nuna bayura de soníos que sigue la filosofía musical dixebriega.

El títulu d’esti trabayu va ser Ente la niebla, presentáu en formatu llibru-cd onde collaboren periodistes, escritores, profesores, historiadores, ilustradores, dibuxantes… que, coles sos creaciones, reflexonen sobre’l pasáu, el presente y el futuru de la clas obrera asturiana. Según la banda: «la evolución histórica de les clases populares y trabayadores d’esti país son parte fundamental de la nuestra idiosincrasia como pueblu y una seña d’identidá con una potencia como poques». Con esti filu conductor preséntase un conxuntu de venti cantares -ordenaos cronolóxicamente- que traten de la llucha obrera, la resistencia antifascista, la represión franquista, l’exiliu, los fugaos, la emigración o les movilizaciones populares. 

Pa contestualizar y entender meyor qué significaron toes estes cuestiones cuéntase coles aportaciones de Rubén Vega, Pablo Texón, Marta Mori, Rafa R. Valdés, Irene Faza, Faustino Zapico, Miguel Solís, Penélope Miranda o Alfonso Zapico, ente otros. Amás, el llibru va abrise con un testu de Primi Abella (guitarrista) onde fala de cómo foi’l procesu de creación de los cantares y de les temátiques concretes de caún, y va zarrase con otru de Xune Elipe (cantante) sobre la rellación de la música y les lluches de les clases populares asturianes a lo llargo de la historia.

‘Ente la niebla’ va ser la obra más ambiciosa y personal de Dixebra, un llibru-CD conceptual alredor de la historia, la llucha y la significación del movimientu obreru y les clases populares asturianes.

Nel terrén musical destaquen les collaboraciones previstes, que van arriquecer el soníu de les pieces y reforzales colos arreglos d’intérpretes como: Toño Gómez (trombón), Rubén Bada (violín), José Manuel Tejedor (gaita), Javier Tejedor (acordión), Lluci Palomares (voz) o Bárbara González-Quevedo (voz).

Ente la niebla, va ser la obra más ambiciosa y personal de Dixebra, un trabayu conceptual alredor de la historia, la llucha y la significación del movimientu obreru y les clases populares asturianes.

Comprar discos de Dixebra na tienda online