Hai unos díes llegaba la noticia murnia de la muerte, de sópitu, del músicu y compositor orixinariu del conceyu de Castrillón Ernesto Paredano, a la edá de 48 años. Afincáu dende hai años en Santo Domingo (República Dominicana), nunca perdiera’l venceyu col so país y la so música.
Dende una óptica clasicista desenvolvió’l so llabor na música asturiana con pieces tipu lied sobre testos en llingua asturiana de so ma, la escritora valdesana María Esther García. Dexaríalo rexistráu nun trabayu discográficu tituláu Alebrix (2007) fechu a comuña ente él al pianu y David Menéndez a la voz. Una rellación cola música asturiana que tamién-y venía per vía paterna, yá que so pá, Ernesto García, fuere director de la Banda de Gaites Castrillón.
Otra manera, va años compunxera les bases musicales pa un par de pieces de l’agrupación d’investigación folclórica avilesina Escontra’l Raigañu, que llegaría a grabales pero que tovía tán ensin asoleyar. Nes sos redes sociales esti colectivu amosaba’l so pesar por esta perda y manifestaba: «Esperamos de corazón qu’esi trabayu tan especial pueda ver la lluz en dalgún momentu y sirva tamién como homenaxe a esti gran músicu».
Ernesto Paredano tenía un perfil académicu y artísticu multidisciplinar de gran solidez. Estudiara la carrera de pianu nos conservatorios d’Avilés y Uviéu. Amás, llograra una titulación de l’Associated Board of the Royal Schools of Music en Gran Bretaña. Igualmente graduárase en Maxisteriu Musical pola Universidá d’Uviéu y en Comunicación Audiovisual pola Universidá de Salamanca.
Suscríbite a les nuestres novedaes
