Rellume pasa de tríu a quintetu. La banda de música tradicional fundada l’añu pasáu por Ana Feito, Alba Suárez y Alba Estrada ta acabante d’anunciar qu’incorporen a la formación a Edu Llosa y Pablo Fernández, músicos d’otres formaciones como Alienda y Abéu que yá andecharon con elles nel conciertu que dieron nel IV Semando Fest.
«Si lo que queríemos yera mete-y al asuntu más punch, necesitábamoslos», publicaron Rellume nes sos redes sociales pa presentar a estos músicos colos que «tener un direutu con más ruíu y fuercia«. D’esta manera, el multiinstrumentista Edu Llosa va ser parte de Rellume como percusionista y Pablo Fernández -tamién redactor collaborador en musicasturiana.com- como guitarrista y baxista. «Gracies chicos por querer formar parte y facer que trabayar xuntos seya tan fácil, sois mui grandes!», conclúin les pandereteres nel comunicáu.
Rellume ye un grupu de cantantes y pandereteres moces que s’estrenaron en 2025 en directo, anque elles lleven cuasique tola vida tocando, cantando y baillando en dellos colectivos de música tradicional como’l Grupu de Baille Tradicional Fitoria, el Grupu Folclóricu y d’Investigación El Ventolín, y Muyeres -nel casu d’Alba Suárez-. La so propuesta ta formada por repertoriu de música pal baille, respetando les estructures tradicionales, pero con toque personal col que dar un relumbrón nuevu a la pandereta y al su son. Con estes incorporaciones a la banda, confirmen que siguen trabayando nesta llinia.
Suscríbite a les nuestres novedaes
