Entama’l Regodón Llaviana, el festival qu’acompaña al 56 Descensu Folclóricu del Nalón

Dende güei xueves hasta’l domingu 24 va celebrase en La Pola el Regodón Llaviana, festival que s’entama coincidiendo col 56 Descensu Folclóricu del Nalón, Fiesta d’Interés Turísticu Nacional. La música n’asturianu va tar presente coles actuaciones de Los Gascones, Los Berrones y Vicente Díaz, que comparten cartelu con otros conciertos y actividaes pa tolos públicos.

Nel Parque de los Príncipes de La Pola Llaviana asítase’l recintu, con accesu llibre, d’esti eventu. Nél va sonar esti xueves 21 la música tradicional de la bandina popular Los Gascones a les 20h y a la medianueche l’agro rock de la mítica banda de Tolivia Los Berrones. Les actuaciones de música’l país rematen el domingu 24 a les 13.30h col conciertu de Vicente Díaz y el so inconfundible pop llariegu.

Amás d’estes actuaciones, va haber foodtrucks, pregón, xuegos infantiles, entrega de premios del descensu y los conciertos d’otros grupos de dientro y fuera d’Asturies: Grison, Manny Calavera, Blus Probes, Infames, Juanillous, Silvia Joyanes, Cassetres, A3 y DJ Faby.