Entós, el nuevu proyectu de Celia Nieto -vigulín (Corquiéu, Draque)-, Javi Menéndez -guitarra/bouzouki (La Garrapiella)- y Adrián Argüelles -xiblata (La Garrapiella)-, ye la segunda banda qu’anuncia la organización del Semando Fest, que celebra’l próximu 7 de febreru na Lata de Zinc d’Uviéu la so cuarta edición.
El tríu propón la so visión personal de la música asturiana de raigañu, mesmo con igües y versiones de temes tradicionales como coles sos propies composiciones, influenciaes por DRD, Talabarte o Kornog, ente otros. Amás, magar de la curtia trayectoria, tocaron yá en festivales como’l d’Ortigueira.
Esta confirmación sigue completando‘l cartelu del Semando Fest 2026, un festival que se consolida como referente pa la música moza con llingua y raíz asturiana y xúnense a unes confirmaciones qu’abrieron Rellume. La edición anterior destacó por reunir proyectos d‘estilos bien variaos na mesma velada —dende música tradicional pa baille hasta power-folk, post-rock y fusiones urbanes— nel que la filosofía del eventu tien un oxetivu marcáu pol relevu xeneracional y la creación de plataformes pa creadores emerxentes na escena musical asturiana.
Suscríbite a les nuestres novedaes
