El Semando Fest anuncia la so primer confirmación pa la próxima edición col nome de Rellume, un grupu formáu por tres moces pandereteres asturianes que representen una xeneración nueva compromesa cola música y col baille tradicional del país. Integráu por Ana Feito, Alba Suárez y Alba Estrada, esti tríu surde de la esperiencia adquirida en colectivos como’l Grupu de Baille Tradicional Fitoria, El Ventolín o Muyeres, y naz col envís d’ofrecer un repertoriu propiu pal baille, respetando la tradición y al mesmu tiempu aportando una identidá renovada. El nome del proyectu, que fai referencia a la lluz y a la enerxía, resume l’espíritu con que les tres intérpretes encaren esti camín: la pasión compartida pola cultura asturiana y pol so patrimoniu musical.
Con esta primer confirmación, el Semando Fest reafirma la so apuesta poles propuestes emerxentes y pola visibilización de los talentos mozos que trabayen n’asturianu, una llinia qu’enmarca’l festival dende los sos entamos. N’diciones anteriores, el certame dio espaciu a proyectos bien diversos y consolidóse como un puntu de referencia pa la creación contemporánea. La presencia de Rellume vien a fortalecer esta orientación, al incorporar una propuesta qu’entemez frescura, rigor y un fondísimu venceyu col patrimoniu musical del país.
La organización del festival va anunciar nueves confirmaciones nes próximes selmanes, calteniendo’l compromisu cola promoción de la cultura asturiana y col apoyu al texíu artísticu emerxente.
Suscríbite a les nuestres novedaes
