Mañana sal en toles plataformes musicales ‘Resollu’, l’adelantu del tercer discu de la Banda Gaites Llacín que lleva’l mesmu nome qu’esti single. Pero enantes, Musicasturiana.com vamos estrenalu n’esclusiva na nuestra canal de YouTube esti xueves 15 a les 20h. Con esti llanzamientu la banda gaites llanisca torna dempués de diecisiete años ensin llanzar un discu.
Como anunció la propia agrupación a traviés de les sos redes sociales, l’álbum va ver la lluz el 27 de xunu y el 4 de xunetu van «presentalu en directo nun conciertu mui especial en Llanes«. Amás, van editar los temes en CD y en vinilu, siendo’l primer trabayu rellacionáu cola gaita que s’asoleya nesti formatu dempués de delles décades.
La Banda Gaites Llacín surdió en 1998 nel conceyu Llanes pente los escolinos de la Escuela de Música Tradicional. Ye una de les más destacaes del país, con dos discos yá publicaos; xires per países como China o Estaos Xuníos; actuaciones nos principales festivales del xéneru y dellos reconocimientos y premios. Dende los sos anicios l’agrupación ta dirixida por Vítor Carbajal y Nuria Tarodo, y foi medrando a lo llargo’l tiempu de los 28 hasta los 65 componentes, convirtiéndose asina nuna de les bandes más numberoses d’Asturies.
El repertoriu qu’executa fai un viaxe pel patrimoniu musical asturianu dende los vieyos temes tradicionales a los más actuales, pasando per composiciones propies, y en delles ocasiones fai fusiones musicales con pieces de los paises que formen l’Arcu Atlánticu. Nel so tercer discu, Resollu, van afondar nesti llabor qu’abrieron discográficamente con Tornallás (2002) y Xideces (2008).
Suscríbite a les nuestres novedaes
