La plaza de Les Aceñes acueye un añu más la Seronda n’Avilés qu’entamen Xuntanza Avilés. Los díes 7 y 8 de payares esa plaza del mercáu va llenase de música, baille tradicional, gastronomía y actividaes pa la reciella. Ye la XXII edición y nella tán presentes artistes y agrupaciones mesmo asturianos como de fuera, col estrenu d’un grupu nuevu de la escena asturiana.
El vienres 7, l’Asociación Cultural de Piniella encárgase d’abrir el programa con música popular y un chigre con productos de seronda dende les 19h. A les 19.15h, la Bandina Cuatrolán -que tamién va actuar a les 21.30h- inaugura oficialmente la Seronda, dexando pasu dende les 20h a una amuesa de sones y bailles tradicionales con Xaréu d’Ochobre y Escontra’l Raigañu -les dos agrupaciones que formen Xuntanza Avilés-. Pa zarrar la nueche, Algaire van tar tocando dende les 22.00h.
El sábadu 8, a les 12.00h, la Bandina Rebulir (Galicia) va «abrir» la carpa, y dar pasu a les 14.00h a la xinta popular, na que se va ufrir pote de berces y arroz con lleche. A les 17.00h, la reciella va poder esfrutar del cuentu La Seronda Encantada: un cuentu bailláu pa la reciella, con Rosa Cuervo. A les 19.00h, volvemos a tener al Grupu Rebulir ufriendo una muestra de sones y bailles tradicionales de Galicia, y a les 20.30h, entama la nueche en danza con la Bandina Los Collaínos, Pandereteres de Rebulir (van facer tamién taller de baille gallegu) y l’estrenu del grupu L.luene, con Alba Gutiérrez a la voz y percusiones, David Varela al curdión y Adrián Argüelles a les flautes. La programación completa pue consultase equí.
Suscríbite a les nuestres novedaes
