El vienres 24 d’abril Rodrigo Cuevas va volver a «servir fañagüeta». El Pabellón de La Magdalena d’Avilés va acoyer a les 21.30h l’arranque de La Belleza, el so espectáculu nuevu que se presenta como «una xira que va llevar la fantasía escénica y conceptual más increíble» de la trayectoria del axitador cultural. Esti martes 23 a les 11 hores pónense a la venta les entraes na web del artista pa esti show que se presenta como «inmersivu» y pal que va haber unes decenes d’entraes especiales pa que la xente participe dientro d’una de les esperiencies más orixinales del recital, que namás va poder disfrutase n’Avilés y notres poques ciudaes de la xira.
«Vamos montar un cabaré dientro del escenariu; un cabaré inmersivu nel que se van vender unes poques entraes pa poder participar nesi cabaré», comentó Rodrigo Cuevas en rueda de prensa xunto a la conceyala de Cultura d’Avilés, Yolanda Alonso. El «ministru de verbenes» desplicó que la xente que tenga estes entraes va tener que dir unes hores enantes, siguir un dress code y va haber «un ratu con ellos pa poder preparar dalgún momentu coreográficu, dalgún momentu escénicu con tol mundu». En resume, «ye una cosa mui participativa la que da la entrada inmersiva y el restu’l públicu va ver lo que pasa dientro d’esi pequeñu cabaré que vamos construir».
Asina ye como’l 24 d’abril el Pabellón de La Magdalena, que tien un aforu de 4.500 persones, va convertise «nel llugar nel que los suaños y lo guapo fáinse terrenales«. D’esta manera l’entamu de La Belleza va ser la producción más importante que Rodrigo Cuevas y el so equipu ficiera hasta la fecha. La dirección escénica ta al cargu de Terrible Studio, la dirección musical de Víctor Martínez y nel equipu van trabayar los músicos y técnicos habituales. Amás de n’Avilés, esti aclamáu músicu va tocar tamién el 21 de setiembre n’Uviéu, dientro de les fiestes de San Mateo, y yá anunció feches n’otres ciudaes de la península ibérica.
La Belleza ye l’espectáculu que va acompañar al tercer discu de Rodrigo Cuevas del que salió hai unos díes l’adelantu ‘Un mundo feliz‘, un tema con dalguna pallabra n’asturianu col qu’él y Massiel presenten un mundu alternativu; muncho más llibre y prestosu y nel que, ente les munches coses poles que nagua l’artista nél, reivindica que «la xente fala n’asturianu, ye la llingua oficial«. Pel momentu nun hai más novedaes publicaes de la próxima entrega, sacantes que la producción vuelve a tar fecha por Cuevas xunto a Eduardo Cabra, prestixosu productor y ex componente de Calle 13 que yá foi responsable d’esta xera nel anterior Manual de Romería.
Suscríbite a les nuestres novedaes
