Asturies y la llingua asturiana pueden aportar a Eurovisión. El portal oficial Eurovision-Spain.com ta acabante de dar los nomes de los 12 semifinalistes de La Elección Interna -el llistáu de cantares que los Eurofans voten pa representar al Estáu español n’Eurovisión 2024- y ente ellos ta «Más Animal» de Rodrigo Cuevas. Agora ábrese un nuevu periodu de televotu -formáu polos socios y llectores d’Eurovison-Spain, y un xuráu integráu pol equipu d’esi portal-, que va rematar el xueves 31 d’agostu a les 20h y nel que van conocese los 5 cantares y artistes finalistes.
«Mujer loba» de Melody, «Clavaíto» de Chanel, «El pájaro fantasma» de Saurom, «Los Ángeles» de Aitana, «Cari» de Julieta, «Me vuelvo a la vida» de Lorena Gómez, «Jota de la Luna» de Dulzaro, «El principio de algo» de La La Love You, «La raíz» de Valeria Castro, «Don Federico» de Colet, «Mon vetlatori» de La Maria y «Más animal» de Rodrigo Cuevas, son los 12 cantares semifinalistes. El de Cuevas ye, xunto col de La Maria -en catalán-, l’únicu que ta cantáu nuna llingua distinta a la castellana, anque na anterior eliminatoria tamién compitieron los cantares n’euskera «Suzko erroberak» de Bulego y en gallegu «II. Lisístrata (Varre vasoira)», de Fillas de Cassandra.
Con esta clasificación la música asturiana nunca tuvo tan cerca de sonar n’Eurovisión gracies al axitador folclóricu por escelencia y a «Más animal», un cantar que como Rodrigo Cuevas comentó a MUSICASTURIANA.COM va unos meses «ye una mezcla de delles melodíes tradicionales. La del estribillu ye la que cantaba pal romance Matutía de Regueira, natural de Fonteta d’El Valledor (Allande) y que recoyeron Ambás y Ramsés y tamién suena un ajechao tradicional de Peñaparda (Salamanca) conocido como El Brillante». Amás d’eso, Cuevas va rapeando nes estrofes delles lletres tradicionales y otres escrites por él nesti cantar que foi’l primer single de Manual de Romería, el so trabayu próximu que va asoleyar el 22 de setiembre.
Un 40% n’asturianu
Anque «Más animal» tea ente los cantares semifinalistes, si Rodrigo Cuevas se clasificara pal Benidorm Fest habría de presentase con un cantar inéditu. Mesmamente, fueron Tanxugueiras quien ganaron la votación d’Eurovision-Spain.com va dos años con «Figa» y finalmente participaron nesti certame con «Terra«. N’entamando setiembre va sabese si finalmente la llingua, la cultura y la música asturiana va concursar nel Benidorm Fest y, d’ehí, poder participar na competición musical más popular y mediática de toa Europa. Sicasí, si esto s’algama, l’asturianu nun va poder sonar en más d’un 40%, por mor de que les normes del Benidorm Fest almiten lletres en tolos idiomes oficiales del Estáu, pero namás con un máximu d’un 40% de lletra n’otres llingües non oficiales -asturianu y aragonés- y foriates.
Suscríbite a les nuestres novedaes
