Dempués de llanzar en xunetu ‘BUMBUM‘, col que facía’l so primer averamientu a la música de raigañu, la cantante Eva Hevia da un pasu más nesa mesma dirección y publica agora ‘Verbena‘, un cantar qu’inclúi dalgún fragmentu n’asturianu y gallegu, entemez gaita d’estos territorios con música electrónica y qu’aporta con un videoclip nel que pue vese baille’l país. Pa facelo arródiase de destacaes collaboraciones: el productor Kike Varela -coautor del tema-, el gaiteru asturianu Daniel Meré, el gallegu Álvaro Puga y les componentes de Rellume.
«Nos últimos años, artistes d’estremaes partes del mundu alcontraron nos sos propios raigaños una fonte d’inspiración pa crear soníos nuevos y averar el folclor a xeneraciones y públicos que quiciabes nunca conectaren con él. De Rosalía a Bad Bunny o Quevedo, la música popular amosó que pue convivir colos soníos contemporáneos y convertise nun llinguaxe universal», desplica la nota prensa que presenta esti cantar. Asina ye como nació ‘Verbena’, que cunta «una historia d’amor nacida nuna romería».
«Kike Varela y Eva Hevia representen precisamente esa forma nueva d’entender la tradición. Dos artistes, procedentes de Galicia y Asturies que crucien agora los sos caminos«, recueye’l testu de presentación del tema. Los dos firmen a comuña la pieza, que cunta cola producción de Varela –DJ gallegu que ta arrasando nes fiestes gallegues cola so «electrofoliada» y qu’acumula más de 118.000 oyentes mensuales en Spotify- y Eva Hevia, cantante asturiana con una carrera emerxente que caleya pente’l pop, r&b y la electrónica.
Xunto a la música «electro-trad» de ‘Verbena’ siéntese una lletra que cunta una historia d’amor de branu ente un gallegu y una asturiana que se conocen nuna folixa. «Una historia aparentemente cenciella que sirve como puntu de partida pa poner en valor tolo que Galicia y Asturies comparten: la música, les fiestes, la tradición y una forma mui particular d’entender la cellebración», plantega la nota prensa. Amás, ye la primer vegada qu’Eva Hevia canta dalgún cachín de la lletra n’asturianu y tamién en gallego, uniendo a estos dos pueblos tamién pela parte llingüística.
“La verdá ye qu’Eva y yo yá faláremos nel pasáu al rodiu la posibilidá de collaborar. Fai unos meses surdió la idea de ‘Verbena’ y creí qu’ella yera la indicada pa esti llanzamientu. Fáime muncha ilusión facer dalgo qu’una a Galicia y Asturies», desplica’l productor Kike Varela. Per otru llau, Hevia sorraya que «trabayar con Kike foi un lluxu», porque siempre almiró «la so forma de llevar la tradición a los soníos d’anguaño«. «Enantes nun esperimentara esti amiestu d’electrónica con gaita gallega asturiana nun mesmu tema, pero la conexón de toos foi increíble y el resultáu fala por si mesmo», añade la cantante.
El cantar llega acompañáu d’un videoclip rodáu en Riosa -onde tien raigaños Eva Hevia-, dirixíu por David Quesada y Romo Herrera y nel qu’andechen baillando asturiano y col traxe’l país les trés componentes de Rellume –Alba Suárez, Ana Feito, Alba Estrada– y Andrea Álvarez. «‘Verbena nun conecta namás dos territorios, sinón tamién dos xeneraciones y dos maneres d’entender la música, amosando que los instrumentos tradicionales pueden evolucionar ensin perder aquello que lo fai reconocible», remata la nota prensa.
Suscríbite a les nuestres novedaes
