Los doce cantares que formen los EPs Páxaros 01 y Páxaros 02 que Ferla Megía asoleyó en 2024 y 2025 van ver agora la lluz en formatu físicu. L’artista sierense y la so axencia, Lacre, llancen una edición llimitada de 200 unidaes d’un doble vinilu tresparente y con carpeta gatefold diseñada pol propiu Megía. El trabayu va presentase’l sábadu 14 de febreru a les 13h na tienda d’Uviéu de Puru Remangu y con entrada llibre.
Nel actu de presentación, Ferla Megía va cuntar cola compañía de Tania Pereira y Rita Ojanguren, collaboradores en dos temes d’esti trabayu, y va interpretar dellos de los cantares que formen la obra, un discu nel que pue sentise electrónica, pop, música tradicional asturiana, reggaeton, boleru, canción d’autor… l’universu sonoru d’un artista vanguardista y multidisciplinar qu’aportó a la música’l país pa traer aire nuevo a la escena.
Col showcase del próximu sábadu Megía entama una xira que pel momentu va llevalu a Llión (19 febreru), Ourense (20 febreru), A Coruña (21 febreru), Taberna Narciso (28 febreru), Teatru Xovellanos (4 marzu) y Festival Interceltique Lorient (1 d’agostu).
Suscríbite a les nuestres novedaes
