«Fici un repertoriu con canciones míes de siempre n’asturianu occidental y vamos estrenar una dedicada a Pin de Cigüedres»

Esti llunes 5 a les 19.30h nel Centru Sociocultural de Balmonte va tener llugar el conciertu homenaxe a Xosé Álvarez, Pin dientro de la  programación qu’entama’l gobiernu asturianu pa festexar la 46 Selmana de les Lletres Asturianes. El responsable de poner música ye Rafa Lorenzo, ún de los pocos músicos pertenecientes al Nuevu Canciu Astur qu’inda ta güei n’activo. Orixinariu de Tinéu, foi l’únicu cantautor d’esti movimientu que vien del occidente del país y que canta na variante occidental de la llingua asturiana.

«Fici un repertoriu con canciones míes de siempre n’asturianu occidental; cousas vaqueiras ya de la redolada y, ente elles, estrenamos una dedicada, como tol conciertu al collaciu Pin de Cigüedres«, desplica Lorenzo sobre lo que se va poder sentir y ver na actuación d’esta tarde. La so amistá con Pin vien dende «final de los años 70» y xuntos collaboraron «nel revistín El Picatueru o en llibrinos como El Val.le Lus Teisos o L’Acabo ya cuentos de Nós. Define al homenaxáu como «un cabezaleru natu» y sorraya que nel cantar que compuso pa estrenar güei en Balmonte llámalu «l.laviegu d’occidente» porque «tenía el valor ya la capacidá de xunir a la xente».

Nun ye la primer vez que Lorenzo actúa nun eventu venceyáu a Xosé Álvarez, Pin: «Tuvi actuando na fiesta del Conceyu d’Asturies en Madrid en 1983«, comenta. Amás conserva delles cartes con él porque, por mor de la so emigración, «el contautu corriente yera per corréu postal». «Echámoslo bien de menos» y «Siempre defenderé la fala occidental», conclúi el cantautor tinetense en rellación a la figura, alcordances y influencia que Pin de Cigüedres tuvo nel so llabor.

Más cultura en Pesicia

El conciertu de Balmonte d’esta tarde ye una de les poques oportunidaes qu’hai pa sentir música n’asturianu nel conceyu de Miranda. Nesi sen, Rafa Lorenzo aprovecha pa reivindicar que «les alministradores, programadores ya xente de la cosa privada se conciencie de verdá; fai falta consumir conciertos d’autor o de folk comprometíu col asturianu en xeneral ya la nuesa variante occidental, porque músicos y creadores hailos«. Asina ye como pidi que «nes celebraciones festives, culturales o etnográfiques falta esi compromisu identitariu; hai abonda materia prima onde escoyer». Esta tarde, nel Centru Sociocultural de Balmonte va vese una amuesa d’esa creación cultural de Pesicia, esi territoriu onde se fala la variante occidental del asturianu y que pol que Pin, Lorenzo y otres persones siguen puxaron, puxen y siguirán puxando.