El branu asturianu sigue acoyendo una montonera d’eventos nos que ta presente la música’l país. Esti fin de selmana, ésta va sonar dientro d’eventos nos que la música, la gastronomía, el cine o l’artesanía son l’actividá cimera. El Mercáu Celta de Les Arriondes, El Puertas Film Festival en Cabrales, L’Arniu Cheese Fest en Soto Ribera y el XXI Festival de la Sidra en Navia son les propuestes que van percorrerer el país d’oriente a occidente.
La primera d’estes actividaes y la más duradera va ser la del Mercáu Celta de Les Arriondes qu’entama nel Parque La Llera esti vienres 11 y dura hasta’l domingu 13. Nella, amás de venta d’artesanía y productos de cercanía, va haber delles actividaes culturales. La estaya musical van desendolcala la Bandina de la Banda Gaites Conceyu Parres, qu’actúa’l vienres 11 y domingu 13 de 18h a 21h; Los Gascones, que toquen el sábadu 12 de 12h a 15h; y Baxel que xuben al escenariu del mercáu el sábadu a les 21.30h. El domingu tamién va haber pasucais con gaita y tambor a les doce la mañana y canción asturiana a les 13.30h.
El cine d’autor va tomar les cais de Puertas, en Cabrales, dende’l vienres 11 hasta’l martes 15 y dientro de la programación de la IX edición d’esti Puertas Film Festival David Varela va dar el conciertu inaugural esti vienres 11 a les a les 20h na Ilesia de Puertas. El multiinstrumentista va interpretar repertoriu propiu y pa la ocasión va tar acompañáu del músicu xixonés Javi Lueje, col que yá tocó en formaciones como como Lliberdón, Merlín, El Koku la Manzana o Xe de Jota. Varela tamién actúa esti domingu a les 13h nel Centru d’Interpretación del Parque Natural de Somiedu, onde va representar l’espectáculu Restolando.
Per segunda vez Soto Ribera acueye l’Arniu Cheese Fest, el festival de los quesos tradicionales y singulares d’Asturies. L’eventu vuelve apostar pola música n’asturianu -amás de por otres manifestaciones artístiques- y esti son va sonar na mañana del sábadu con un conciertu de 6 Riales a les 13.30h -les pandereteres faen doblete esi día y toquen a la nueche en La Figal de Xugabolos de Salas-, y col Desarniu Fest qu’entama a les 20h. Presentáu como un «festival musical asturianu de nueves tendencies», nel so cartelu van actuar los Pandereteros d’Anguaño, Llevólu’l Sumiciu y Anabel Santiago dúu. Esta última artista amás actúa’l domingu 13 a les 19h na Casa la Cultura de Grandas de Salime.
Sidra y música nel occidente
Pa zarrar la programación d’estos eventos multidisciplinares del fin de selmana ta’l XXI Festival de la Sidra de Navia nel qu’actúen Caldo y Os Rabizos. La bandina tradicional del Eo-Navia toca a les 21h nesti veteranu eventu que puxa pola bebida nacional na fastera más occidental del país.
(Na semeya, los Pandereteros d’Anguaño)
Suscríbite a les nuestres novedaes
