El miércoles 19 de payares morrió José Antonio Espina Montoto, conocíu como Antonio’l de Villar, que foi l’últimu vigulineru tradicional del conceyu de Piloña. La organización de les Xornaes del Vigulín informó d’esta perda nes sos redes sociales porque amás Espina foi la persona que protagonizó’l cartelu de la tercer edición d’esti eventu.
«Abriónos la puerte casa, onde deprendimos del so arte y la so sabencia, que tanto necesitábamos p’ampliar el trabayu d’investigación de lo que diben ser dempués les I Xornaes del Vigulín Tradicional y tan arrogante como yera, regalónos tamién la so figura pa protagonizar el cartelu de les III Xornaes. Foi un xestu, pa nós, inolvidable», comentaron dende la organización, que quixo mandar «el pésame más sentíu a la familia y facer alcordanza perpetua de la so importancia pa la música de Piloña».
Dende MUSICASTURIANA.COM llamentamos fondamente la perda d’esta persona tan destacada pa la música tradicional del país.
Suscríbite a les nuestres novedaes
