Güei finó n’Uviéu a los 70 años d’edá Jorge Martínez, tamién conocíu como «Jorjón» o «Jorge Ilegal». Un cáncer llevóse al fundador, cantante y guitarrista de la mítica banda Ilegales, el grupu de la escena musical fecha n’Asturies que más repercusión tuvo dientro del rock español y que más trescendió tamién pel continente americanu. «Jorjón» nunca tuvo venceyu cola música n’asturianu y en declaraciones públiques amosó’l so rechazu a la llingua asturiana y a la so oficialidá; pero’l so llabor per más de cuatro décades y el so carisma polémicu fixeron d’él una figura clave dientro d’una escena sonora d’Asturies que güei llamenta la perda d’un personaxe míticu. Dende MUSICASTURIANA.COM sumámonos a les condolencies pol fallecimientu d’esti rockeru únicu.
Suscríbite a les nuestres novedaes
