El pasáu 18 d’agostu morría, a los 78 años, Roberto Díaz de Orosia, pintor xixonés que convirtió la so obra nun reflexu de les romeríes, sidreríes, paisaxe y personaxes de la cultura popular asturiana. De formación autodidacta desenvolvió un llabor de más de cinco décades siempre venceyáu a la imaxe d’Asturies. Na so pintura tán mui presentes les fiestes, los tipos populares, les celebraciones y esi universu rural y festivu que fai parte de la memoria colectiva asturiana. Tamién, como elementu central de too ello, la pareya de gaita y tambor qu’en bien de veces reflexó n’estampes romeres y festexeres, asina como la temática sidrera y tolo que l’arrodia, como ye’l casu de los coriquinos y la tonada.
La so pintura caracterizábase por unos empastes fuertes, un color vivu y grandes manches, que combinaba colos motivos inspiraos nes romeríes, feries, mercaos y fiestes asturianes —ente elles l’Antroxu—, hasta convertir la cultura popular del nuestru país nun elementu central de la so identidá artística. La so primer esposición individual celebróse en 1973 na Galería Botticelli de Xixón y, dende entós, la so obra pudo vese n’esposiciones y colecciones d’Asturies y d’otros países europeos y americanos.
Anque la so trayectoria pasó por distintes etapes y temátiques, foi especialmente reconocible pola mirada que dedicó al costumismu asturianu. Nesti sen, la so obra tresformó paisaxes, romeríes, fiestes, personaxes y costumes d’Asturies en materia pictórica, con una estética mui personal na que’l color, l’humor y cierta deformación espresiva dieron una dimensión nueva y perorixinal a la nuestra tradición. La so rellación cola cultura sidrera foi reconocida pola Buena Cofradía de los Siceratores d’Asturies, que nel so X Axuntábense, celebráu en Nava nel 2024, nomólu Cofrade de Méritu.
Roberto Díaz de Orosia déxanos una obra na que míranos como pueblu, na qu’espeya cómo los asturianos y asturianes nos rellacionamos y socializamos históricamente, na que la figura de la pareya del gaiteru y del tamboriteru yera —y ye tovía anguaño— un elementu central.
Suscríbite a les nuestres novedaes
