Más de 30 llanzamientos de música asturiana en 2021

L’añu recién acabáu zarróse con más de 30 llanzamientos publicaos de música’l país. Según la Sonoteca del AMCA (Archivu de la Música Contemporánea Asturiana), na que s’incluyen los llanzamientos –singles, EPs, discos completos…-, editaos tanto en formatu físicu como a traviés de Spotify, BandCamp o otres plataformes dixitales; el pasáu 2021 continuó la tendencia de poques novedaes en formatu CD frente a los singles o EPs en formatu dixital.

Namás ocho referencies salieron en formatu físicu: el llibru y triple CD de Carlos Rubiera ’30 Asturianaes’, ‘N.O.S.’ de L-R, ‘Rock&Fierro’ de la Banda Gaites Camín de Fierro, el discu de Tania Pereira ‘Un sueño dentro de un sueño’ -qu’inclúi dos temes n’asturianu-. los ‘Cantares de… y pa neñ@s’ de Fernando Valle Roso y Silvia Moreno, l’EP ‘Asturtralla‘, ‘El Cantar del Simpatías’ de Baxel y ‘Xanzaina’ de Luis Núñez y Los Folganzanes.

Per otru llau, les referencies qu’asoleyaron en formatu dixital -con portada propia y tratamientu de single/EP/discu en Spotify y otres plataformes dixitales especializaes en música-, recueyen una bayura estilística que va dende’l electropop de San Jerónimo con Rodrigo Cuevas, hasta’l blues-rock de Diañu Blues, pasando pol folk tradicional d’Abéu. Destaca tamién la electrónica de raigañu, que nunca enantes tuviera tantos llanzamientos nun mesmu añu, gracies a la producción de Llevólu’l Sumiciu, Fruela 757, L.lercia y A Fesoria.

Primeros discos anunciaos pal 2022

Pa esti 2022 que tovía vuelve a tar marcáu pol andanciu, yá se conocen dalgunos de los nuevos trabayos que van asoleyar. L’esperáu ‘Ente la Niebla’, llibru-discu con venti cantares nuevos col que Dixebra cellebren 35 años y que ta previstu que salga nel primer trimestre de 2022; el nuevu EP n’asturianu d’Alfredo González, el segundu discu de Rubén Alba, ‘Sirio’ de Fontoria, l’EP del gaiteru Tever, ‘Coral y Maera’ d’Algaire…. son dalgunos de los proyectos anunciaos. Amás, esti vienres 14 de xineru salen los nuevos CDs de Nacho Vegas -qu’inclúi dos temes n’asturianu– y de Marisa Valle Roso, qu’anque nun va tener nengún tema n’asturianu sí que bebe del raigañu sonoru del país en pieces como “Tonada“.

Mercar novedaes na tienda online

Dexa un comentariu

X