Gaiteros del Carbón lleven 10 años dando tira a la música tradicional dende la Cuenca’l Nalón y, tres del espectáculu qu’entamaron pa festexar l’aniversariu, siguen anunciando actividaes nueves pa celebrar esta década d’actividá. Tán acabante de presentar La Pitanza, un «festivalucu» que’l domingu 5 de xunetu va enllenar el Prau La Chalana de Llaviana de música’l país coles actuaciones de Pau Santirso y María Vázquez y d’Abéu.
«Con vermú. Con música. Con comida. Con rises. Con amigos. D’eso va La Pitanza. Nun va de conciertos. Nun va de food trucks. Nun va nin siquier de celebrar los 10 años de Gaiteros del Carbón. Va de daqué muncho más importante. Va de tar xuntos. Que pa disgustos ya llega’l restu de la selmana», con eses pallabres Gaiteros del Carbón anunció nes sos redes la celebración de La Pitanza, una xornada qu’entama a les 13h col Vermú en Danza que va poner la pernomada pareya de música tradicional Pau Santirso y María Vázquez.
Tres d’una xinta na que va haber dos food trucks -La Dinamitera y La Lloca-, toca’l cuartetu mozu Abéu, qu’asina van presentar en Llaviana K-MUDAR el so primer trabayu discográficu, que ta recién asoleyáu y col que ufren la so visión actual d’una montonera de pieces populares que percuerren el raigañu sonoru d’Asturies d’oriente a occidente. Con esti eventu, la música asturiana sigue sumando fiestes y festivales a una axenda qu’esti branu ta enllena d’actividá.
Suscríbite a les nuestres novedaes
