Na comunidá autónoma de Madrid hai una montonera d’agrupaciones de música y baille tradicional asturianu y esti sábadu 23 de mayu munches d’elles van facer una Xuntanza en Guadarrama. Esti alcuentru va celebrase dende les 11 la mañana y nél participen les bandes de gaites Respingo (Alcobendas), Estaferia (Tres Cantos) y La Tarabica (Guadarrama); amás de los grupos de baille Andolina (Alcobendas) y Les Ayalgues (Ayer) y de pandereteres El Garabatu (Tres Cantos).
La cita ta entamada poles Casa d’Asturies de Guadarrama, cola collaboración de la d’Alcobendas y del Centru Asturianu de Tres Cantos, col sofitu del Ayuntamientu de Guadarrama y de la Dirección Xeneral d’Emigración y Polítiques de Retornu del Principáu d’Asturies; y ye una oportunidá pa facer rede ente la comunidá d’asturianos y asturianes emigrada a Madrid y ente les persones descendientes d’emigrantes. Amás, al cuntar cola participación del grupu Les Ayalgues de Cabanaquinta espárdese’l venceyu con Asturies.
La programación de la Xuntanza entama a les 11h con un pasacáis per Guadarrama y a les 12.30h toles formaciones participantes van actuar na Plaza Mayor d’esta llocalidá del norte de Madrid. Esti ye ún de los eventos qu’entama la Casa d’Asturies de Guadarrama, qu’organiza de siguío delles actividaes pa divulgar y visibilizar la cultura asturiana de raigañu nesi territoriu. Dientro d’elles, tienen programao actuaciones de Xuacu Amieva, Anabel Santiago o Alberto Varillas; amás, son l’agospiu de la Banda Gaites La Tarabica, qu’esti añu va actuar nel Festival Intercélticu de Lorient pa representar a la diáspora asturiana.
Suscríbite a les nuestres novedaes
