Dende esti llunes 21 y hasta’l sábadu 26 d’abril, La Pola enllénase de baille, música y cultura tradicional gracies a la XLIV Selmana del Folclore Astur qu’entama’l Grupu Folclóricu y d’Investigación El Ventolín de Siero. Actuaciones, talleres, el festival folclóricu y teatru costumista dan forma a una programación marcada pola presencia de la Herri Arte Eskola d’Errenteria, entidá cola qu’El Ventolín collaboró’l setiembre pasáu nun intercambiu cultural bien orixinal.
La xornaes arranquen güei a les 20h na sala pequeña del auditoriu de La Pola cola presentación de les actividaes y el primer conciertu de Rellume, tríu xoven de pandereteres asturianes que se presentaba apocayá. El martes 22 pela mañana ye la bendición de los Güevos Pintos na Plaza l’Ayuntamientu y ellí va actuar l’alumnáu de la Escuela de Música Tradicional d’El Ventolín. Pela tarde, esti grupu folclóricu y d’investigación tamién va animar el Parque Alfonso X con otra actuación.
El miércoles 23 ye’l momentu pal teatru costumista a cargu del Grupu de Teatru Carbayín, mientres qu’a partir del xueves entamen yá les actividaes que nacen de la conexón qu’hubo cola Herri Arte Eskola d’Errenteria. La entidá guipuzcoana va poner un taller a les 20h del día 24 la sala pequeña del auditoriu y va participar el vienres 25 a les 20h na sala grande d’esti auditoriu nel Festival Folclóricu, xunto al alumnáu de les EMT de Fitoria y El Ventolín.
L’eventu remata’l sábadu 26 na sala grande del CEPI de Llugones. Ellí va celebrase un conciertu entituláu Asturiar Konexiona / Conexón Asturies nel que la mentada Herri Arte Eskola va averase al repertoriu asturianu y poner asina el ramu al intercambiu cultural y pedagóxicu que caltuvieron con Fitoria y El Ventolín con ellos dende marzu del pasáu añu y qu’implicó a más de 65 persones.
Suscríbite a les nuestres novedaes
