El sábadu pasáu El Natahoyo acoyó l’actu d’inauguración de la cai y de la placa n’alcordanza d’Ígor Medio, dibuxante y músicu fundador de Felpeyu fináu hai dos décades. Sicasí, la placa colocada namás tien n’asturianu una esbilla de la lletra de ‘Los fayeos de mayo’ y el testu que l’acompaña ta en castellanu, motivu pol qu’Iniciativa pol Asturianu denuncia que ye «mui triste suprimir l’asturianu nun espaciu de memoria dedicáu a una persona que fixo de la llingua asturiana una ferramienta d’espresión musical y de creación artística, asina como de reivindicación«.
«Ígor Medio foi una figura fundamental na defensa del asturianu y de la so oficialidá, polo que nun resulta de recibu un homenaxe nel que s’arrequexe precisamente l’idioma qu’amaba y defendía«, critica l’asociación en defensa de los derechos llingüísticos n’Asturies. Amás, tamién denuncien «que’l protocolu del Conceyu utilizara únicamente la toponimia desfigurada na invitación oficial al actu d’inauguración, prescindiendo de la forma oficial Xixón, aprobada conforme a la llexislación vixente, xusto cuando se cumplen 20 años de la oficialización de la toponimia tradicional del conceyu y el gobiernu municipal quier entamar una serie d’actos conmemorativos».
Dende l’asociación consideren que «convidar a un actu d’homenaxe con un documentu qu’incumple la toponimia oficial y instalar una placa namás en castellán dedicada a un referente del asturianismu evidencien una falta de sensibilidá y una falta de respetu a la persona reconocida y a la llingua asturiana», y ye por eso mesmo polo que reclamen al Conceyu de Xixón «que rectifique esta situación incorporando una versión íntegra n’asturianu na placa conmemorativa y garantizando que, de cara al futuru, la comunicación institucional respete tanto la toponimia oficial como la presencia del idioma nos actos públicos«.
Suscríbite a les nuestres novedaes
