En 2021 volvieron dempués de 25 años d’inactividá Asturtralla, ún de los primeros grupos qu’hubo de punk-rock n’asturianu. Tres de la publicación de los EP Asturtralla (2021) y Grasa pal focicu (2023), la formación llanza agora un single nuevu: ‘Asturies Insumisa‘. Ye’l primeru de tres cantares nuevos que va publicar esta primavera y que sirve p’avanzar los planes que’l grupu tien per delantre: «asoleyar un EP dempués de setiembre y enantes qu’acabe l’añu, en payares, dar un conciertu y llueu volver a dar más actuaciones».
‘Asturies Insumisa’ ye una versión de ‘Zapatista’ de Dixebra, pero con una lletra camudada y que ta dedicada al colectivu que da nome al cantar.»Tán lluchando por volver a tomar la cai los obreros, tán metíos en toles histories del turismu que se ta desfasando, nel movimientu de la vivienda, coles 6 de La Suiza… por eso nos apeteció dedica-yos la canción y da-yos un poco más de visibilidá», desplica Xelu Estébanez, cantante y cabezaleru d’Asturtralla, al rodiu les razones que tán detrás de la lletra d’esti tema publicáu el 1 de mayu, Día Internacional de la Clase Trabayadora. La portada del single tamién ye obra d’esti colectivu.
«La versión de ‘Zapatista’ naide la grabó nel tributu ¡Salú ya Dixebra! y pamidea Dixebra la esplotó poco, porque ye una canción que mola, cola gaita y la parte punkarra. A mí siempre me prestó enforma y por eso quixi facer esta versión», comenta Estébanez. Tamién l’alcordanza ta tres de les razones: «el primer conciertu que dio Astutralla con Dixebra foi cuando presentaron el discu Apúntate a la llista na Sala Quattro d’Avilés».
Esti tema abre una serie de llanzamientos nuevos d’Astutralla. A lo llargo de mayu y xunu van publicar otres dos versiones: ‘Nun somos nada’ de La Polla Records y ‘Ye un crimen’ d’Eskorbuto. Himnos del Rock Radikal Vascu qu’esta banda reinterpreta n’asturianu. Tolos temes tán grabaos nos Tutu Estudios de Corvera -«Sergio trátanos de puta madre y saca un soníu de la ostia», sorraya Xelu- y nellos collaboren Isra Sánchez (ex Dixebra, ex El Sueño de Morfeo) a la batería y José Manuel Tejedor a la gaita.
Amás, la banda vuelve al llocal d’ensayu el 10 de mayu porque yá tienen planes de tornar a los escenarios: «va haber conciertu. Yá hai fecha y sitiu; va ser en payares pero tovía nun lo voi decir por si acaso se tuerce daqué», esclaria’l cantante. Lo que sí que ye seguru ye qu’en setiembre vuelven «al estudiu a grabar otros cuatro temes» y que la intención ye dar más conciertos dempués d’esi de payares.
Suscríbite a les nuestres novedaes
