Vuelve l’axitador folclóricu, el rei del cortexu, el llabrador d’una Asturies diversa y arguyosa de la so identidá rural, l’animal escénicu. Y torna faciéndolo «Más animal«, porque lo fai tradicional. Rodrigo Cuevas ta acabante sacar el primer adelantu del so próximu llarga duración, un trabayu que va asoleyar en setiembre col nome de Manual de Romería y que tuvo grabando en Puerto Rico baxo la producción d’Eduardo Cabra, más conocíu como Visitante, el multiinstrumentista, compositor y productor de Calle 13. El cantar naz con un oxetivu mui claro: «tresmitir diversión»
«»Más animal» ye una mezcla de delles melodíes tradicionales. La del estribillu ye la que cantaba pal romance Matutía de Regueira, natural de Fonteta d’El Valledor (Allande) y que recoyeron Ambás y Ramsés», desplica Rodrigo Cuevas. Tamién suena «un ajechao tradicional de Peñaparda (Salamanca) conocido como El Brillante». Amás d’eso, Cuevas va rapeando nes estrofes delles lletres tradicionales y otres escrites por él.
La intencionalidá desenfadada d’esti cantar y del so videoclip ta clara y desplícalo asina l’axitador folclóricu: «Tengo una visión mui llúdica y mui divertida de la música tradicional y del folclore porque diviértome muncho con él. Creo que la xente que fai folclor tamién se divierte, pero a vegaes el facelo lo más fiel posible a la versión que nos llegó fáinos escaecer que’l folclore ye una historia llúdica de diversión colectiva y popular». Nesti sen, el músicu camienta que la música tradicional «nun ye una displicina que l’oxetivu seya algamar una escelencia, sinón divertise, y eso ye lo que quiero tresmitir»
Con iLe y Ricardo Villoria
Pa facer esta animalada l’uviedín afincáu en Piloña nun ta solo. Per un llau arrodióse del artista audiovisual llavianés Ricardo Villoria pa dirixir el videoclip. El creador de, ente otres obres, la esposición Reinterpretacion de la Cultura Tradicional Asturiana trabaya xunto a Rodrigo Cuevas per tercer vegada, dempués de dirixir los videos de «El Toro Barroso» y de «Muerte en Motilleja».
Y de Villoria a Puerto Rico. Esti asturianu universal continúa’l camín de la internacionalización de la música asturiana qu’abrió a finales del sieglu XIX Ramón García Tuero, El Gaiteru Lliberdón, y pa esti trabayu enanchó llazos al otru llau de la mar. iLe, hermana de Visitante, de Residente y tamién componente de Calle 13, acompaña a la voz de Cuevas en «Más Animal»: «Convidóme enantes a facer una collaboración nel so discu y acoyóme muncho en Puerto Rico. Enseñóme tolos ritmos tradicionales, llevóme a fiestes, desplicóme lo que ye la plena, lo que ye la bomba, lo que ye la rumba, toles tradiciones musicales, la música guajira… entós paecióme mui guai que tuviera ella nel cantar».
Conciertu n’El Prestoso
Dempués d’esti subidón toca esperar cinco meses pa poder sentir el trabayu enteru de Rodrigo Cuevas, un álbum del que’l músicu nun quier desvelar munchos detalles más allá de sorrayar que va ser un trabayu «mui llúdicu, mui divertíu, de romería». Mentanto, a enganchase a «Más Animal» y a disfrutar de la puesta n’escena nel únicu conciertu que va dar pel branu n’Asturies: el vienres 4 d’agostu nel Prestoso Fest (Las Barzaniel.las, Cangas del Narcea).
Suscríbite a les nuestres novedaes
