Entós ye unu de los grupos mozos que va protagonizar la cuarta edición del Semando Fest, una edición mui ecléctica na que vamos poder atopar dende tonada y folk hasta hardcore. El tríu de folk aporta a esti festival que nació de la mano de Musicasturiana tres pasar per dalgunos de los escenarios más importantes pa la música de raigañu, como, por exemplu, el Festival d’Ortigueira.
El tríu componse de violín, flauta travesera de madera y bouzouki/guitarra, creando una sonoridá acústica que abraza tanto pieces tradicionales asturianes como composiciones orixinales. La identidá d’Entós asitiase na intersección ente la tradición y la reinterpretación, ufiertando una esperiencia musical que conecta pasáu y presente. Fórmenlo Celia, Javi y Adrián y ye, precisamente con esti últimu, col que falamos díes enantes de la cita na Lata de Zinc d’Uviéu.
¿Cómo y cuándo nació Entós como proyectu musical?
Entós naz en 2022 nuna sesión onde coincidimos los trés. Alcordamos quedar pa tocar un día xuntos, ensin tampoco muncha más pretensión. Poco a poco foi tersformándose nun proyectu, con un propósitu y una motivación de querer enseñar el resultáu.
«Consumimos muncha música, y creyemos que la mayor ventaya cola que cuntamos los músicos anguaño ye l’accesu a infinites referencies. Nun va tanto, esto yera impensable»
La vuestra música bebe de la tradición, pero mira tamién pal presente. ¿Cómo definís esi equilibriu?
Hai infinites maneres d’entender la tradición. Caún tenemos la nuestra. Creyemos que tradición y presente van de la mano, nun se puede entender un término ensin l’otru. Pa nós, la tradición nun dexa de ser el puntu de partida y trabayamos con ella dende lo que somos anguaño.
¿Qué referentes musicales vos marcaron más a la hora de crear Entós?
Muchísimos… Consumimos muncha música, y creyemos que la mayor ventaya cola que cuntamos los músicos anguaño ye l’accesu a infinites referencies. Nun va tanto, esto yera impensable. Hai álbumes que son tótems como Dual d’Igor Medio y Lisardo Prieto o los dos discos de DRD. Saliendo d’Asturies, préstanos muncho lo que se fai en Bretaña (Jean Michel Veillon, Jacky Mollard…). Tamién somos mui fans de Talabarte, Fernando Barroso… ¡podríemos dicite tantos!
¿Qué llugar ocupa la música tradicional na vuesa vida musical y personal?
Ye un pegoyu alredor del que xira bona parte o casi too a lo que nos dedicamos. Los trés tenemos munchísimos proyectos amás d’Entós. Hai tamién carreres profesionales paraleles, estudios… Tenemos un sentimientu estrañu porque magar de que dedicamos munchísimes hores, prestaríanos tener entá más tiempu.
«Hai qu’acabar col discursu pesimista de que nun hai relevu, nun hai músicos… Sí que los hai. Les escueles de música tradicional nunca tuvieron tantos alumnos. Hai más xente mozo baillando y tocando que nunca»
Vais actuar nel Semando Fest. ¿Qué puede esperar el públicu del conciertu d’Entós?
Repertoriu de muñeires, xotes y dances al fallu. Tamién temes más tranquis, composiciones… Siempre intentamos tresmitir la pasión que nos fai mete-y tantes hores a esto. Al final, el nuestru oxetivu ye qu’esfruten polo menos tanto como nós tocando.
¿Qué tien d’especial tocar nun festival que sofita la cultura y, especialmente, la cultura fecha por xente mozo?
Tenemos munchísima suerte de que s’entamen estos festivales. Hai qu’acabar col discursu pesimista de que nun hai relevu, nun hai músicos… Sí que los hai. Les escueles de música tradicional nunca tuvieron tantos alumnos. Hai más xente mozo baillando y tocando que nunca. Hai sofitu institucional. Ta faciéndose un llabor fundamental dende asociaciones de tou tipu. Si yá hai un presente, ¿cómo nun va tener esto futuru?
«Préstanos abondo ser parte d’una comunidá que va creciendo tanto en cantidá como en diversidá na música que se ta faciendo»
¿Qué significa pa vosotros formar parte del momentu actual de la música tradicional asturiana?
Préstanos abondo ser parte d’una comunidá que va creciendo tanto en cantidá como en diversidá na música que se ta faciendo. Hai ufiertes de tou tipu, dende’l folk más tradi, hasta trap pasando per música electrónica. Hai toa una xeneración de músicos (y escritores, ilustradores, cineastes..) apostando por proyectos mui interesantes.
Pa quien tea dudando en dir a la vuestra actuación, ¿por qué nun tendría que perdelo?
Cuando vimos el cartel d’esti festival comentábemos los trés que va ser un festival super eclécticu, con propuestes pa tolos gustos. Ye una bona oportunidá pa que xente que nun nos conoz pueda escuchar la nuestra propuesta. Y la que sí nos conoz, que tenga la oportunidá de sentir propuestes como Rellume, Pvxarra o Lucía Rojo+Fruela 757. Va prestar.
Suscríbite a les nuestres novedaes
