Skama la Rede presenten el vinilu-llibru ’20 años’ esti sábadu n’Uviéu

Yá llega l’esperáu discu nuevu de Skama la Rede. Esti sábadu 13 d’avientu a les 19h la llibrería Matadero Uno d’Uviéu va acoyer una charra de presentación onde van participar los miembros del grupu y onde va tar per primer vez a la venta al públicu 20 años, un trabayu formáu por un vinilu con ocho cantares y un llibru de 30 páxines nel que destaquen les collaboraciones de persones estremaes venceyaes a la escena musical.

Los cantares que se van poder sentir nel vinilu inclúin la collaboración a la voz de Pirri (Escuela de Odio), Ramón Blanco (Los Berrones), Daviz Rodríguez (Mala Reputación), Humber (Misiva) y Raquel (Ochobre). Amás vien acompañáu del llibru onde se resume la historia de la banda a traviés de testos de David Artime “Roxu” (periodista, escritor y lletrista del grupu), Xune Elipe (productor musical y cantante de Dixebra), Xicu Ariza (periodista y director de musicasturiana.com), Natalia González (Llibrera, gaitera d’Ochobre y presentadora del actu), Nuno Feliz (fotógrafu y collaborador del FIMI Lisboa) y Gabri Reigosa (cantante de Dakidarría). Too ello con semeyes de dellos autores, recortes de prensa y entraes de los últimos venti años.

’20 años’ supón el quintu discu d’estudiu de Skama la Rede, ve la lluz 11 años dempués de la publicación de la so anterior entrega y ta, per primer vez, autoxestionáu dafechu pola propia banda. El diseñu del vinilu y del llibru cuerre a cargu d’Alfonso Zapico d’A Sangre Estudio Gráfico y los cantares grabáronse en Tutu Estudios de Corvera cola producción musical de Sergio Rodríguez, como toles sos anteriores referencies

Plataformes musicales

Amás de la presentación del sábadu en formatu físicu, l’álbum va ver la lluz en formatu dixital el próximu llunes 15 d’avientu. D’esta manera van poder sentise en toles plataformes musicales estos cantares nuevos de Skama la Rede y l’actualización de les canciones del 2019 que grabaron y publicaron en dixital pero nun s’enxertaron en nengún discu físicu y qu’agora van ver la lluz coles destacaes collaboraciones.