La Banda Sonora de Berto M. Castañón

Berto M. Castañón (Avilés, 1976) lleva cuasi 25 años al frente del grupu punk-folk Skontra. El so venceyu cola música’l país aportó bien temprano: a los cuatro años entamó a baillar en Grupu Folclóricu de San Cristóbal, a los nueve deprendió a tocar la gaita y a los dieciséis entró na agrupación avilesina Escontra’l Raigañu. D’adolescente descubrió’l punk y el rock y too camudaría. Foi gaiteru de la primer formación d’Asturtralla y en 2001 foi cofundador de Skontra, banda referencial cola que sigue pisando escenarios de dientro y fuera d’Asturies.

Con él siguimos la estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y marcaron.

Sienti la playlist La Banda Sonora de Berto M. Castañón

Un discu qu’enxamás canses de sentir.

Hai munchos… El No te muevas de los RIP, el directu de La Polla, el de Barricada… El Ante todo mucha calma de Siniestro Total… El Never Mind The Bollocks de los Sex Pistols… Cuasi tolos d’Extremoduro…

Si tuvieres que formar parte d’otru proyectu musical, ¿cuál sería?

Ensin dulda nenguna, gustaríame formar parte d’un grupu de rancheres (non mariachis), que pudiera facer repertoriu n’acústicu, con un repertoriu de rancheres clásiques y adaptaciones d’otros temes… Siempre me flipó esi formatu; una especie de Kojón Prieto y Los Huajolotes.

De los cantares que compusisti o interpretes, ¿cuál ye’l to preferíu?

Por tolo que nos dio, creo que sería inxustu non dicir que ‘Y sigo en pie’ ta nel top… Tamién tengo-y especial ciñu a un cantar que salía na maketa que se titula ‘Pesadilla’ y pue considerase’l primer “tema propiu” de Skontra.

«Gustaríame formar parte d’un grupu de rancheres (non mariachis), que pudiera facer un repertoriu acústicu de rancheres clásiques y adaptaciones d’otros temes… Siempre me flipó esi formatu; una especie de Kojón Prieto y Los Huajolotes»

¿Cuándo foi la primer vez que xubisti a un escenariu y que pasó enantes, durante y dempués?

La primer vegada que xubí con una banda a tocar foi con Asturtralla nel Rotten Chigre d’Avilés, allá pel añu 93/94… Lo que pasó enantes nun lo recuerdo enforma. De lo que sí que tengo alcordanza ye que taba petao y facía muncha calor. Mentanto, pasaron munches coses: delles collaboraciones, ente elles la de Xune de Dixebra. Y dempués, pues nun m’alcuerdo muncho tampoco; marcharía pa casa.

¿Qué ye lo más inxusto de ser artista?

Bono, too depende si te consideres artista, o les intenciones que tengas nesti mundín. La mio posición ye que nunca tuvi más propósitu que cuntar les coses que pasen al mio alredor y, al empar, pasalo bien… Que-y echamos munches hores (enantes más qu’agora), que los llocales nun son mui cómodos, que faes hores de furgoneta como un pollín, etc. son coses que, como dicimos nun tema, “sarna con gusto no pica”…

Bien estremao ye lo que pueda pensar el/la ARTISTA (asina, con mayúscules); el que se dedica a ello profesionalmente y que depende de munchos factores pa poder vivir… Imaxino los mieos, inxusticies y penalidaes que se pasen pa sacar alantre proyectos artísticos que te dexen siguir con un proyectu de vida. Pa toos ellos y elles la mio almiración y aplausu.

Si fueres Conseyeru de Cultura, ¿qué son les primeres coses que fadríes?

Nunca entró dientro de les mios intenciones el dedicame a la política… Pero creo que dende esa posición podría dase muncho más sofitu a tolos proyectos artísticos: lliterarios, musicales, audiovisuales, etc. Y como non, dedicaría l’esfuerzu que fuera necesariu pa que se reconociera l’asturianu como llingua co-oficial. Ah! Y lo primero que fadría sería resolver el tema de les llicencies pa qu’haiga munchos más sitios onde tocar en directo… menuda mierda de panorama qu’hai na actualidá.

«Culposamente y por obligación siento delles coses que tengo que poner dacuando nel coche al guah.e y que nun voi nin a nomar… Por suerte, y quitando delles escepciones, creo que tamos pel bon camín (o eso creo)»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Primero diría cómo foi llegando esti tipu de música a mí… Dende los 4 años tuvi en grupos de baille tradicional, y dende los 9 años tocando la gaita… La primer vegada que fui a un conciertu foi a ver a Siniestro Total con 14 años, y abluqué… Y, como non, el primer grupu n’ast d’esti estilu que vi enriba d’un escenariu foi a Dixebra, anque yá viera munchos grupos folk de la dómina… Asina que digamos que primero llegó “l’estilu” y dempués l’asturianu.

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Últimamente diome por Parquesur, pero culposamente poco… Culposamente y por obligación, delles coses que tengo que poner dacuando nel coche al guah.e y que nun voi nin a nomar… Por suerte, y quitando delles escepciones, creo que tamos pel bon camín (o eso creo).

¿A qué personaxe públicu convidaríes a un conciertu tuyu, a pasar llueu pel backstage y pa qué?

Molaría un pre y un post conciertu con Raúl Cimas y Ernesto Sevilla… Bones rises, ¿non? Cola que ta cayendo, siempre vien bien una migaya de bon humor, y creo que neso ellos son unos mayestros (o eso paecen, igual dempués son unes murnios de la ostia…).

Yá qu’escoyisti la to Banda Sonora Vital, vamos rematar con una Banda Sonora Orixinal. ¿De qué llibru n’asturianu prestaríate qu’hubiere una película a la qu’amás pongas-y tú la BSO?

Podría tar bien una película basada nel llibru de Pablo Barrio Xugar a Nada… Esi amiestu de novela negra col fútbol y los negocios qu’escuende podría dar pa una bona BSO.

Asina fala Berto M. Castañón de los cantares qu’escoyó pa la so playlist

LLAN DE CUBEL: Cantar del ayerán que perdió la guerra. Llan de Cubel siempre foi un referente pa mí de la música folk d’Asturies… Esti tema siempre me flipó: la lletra, la temática… Igual pola mio ascendencia ayerana.

FELPEYU: La Raitana. De bien mozu conocí a Felpeyu… y ún de los primeros cantares que sentí d’ellos foi esti. Quedóme la lletra na cabeza grabada, y ye parte de la mio banda sonora personal porque ye una tema que davezu canturréu…

BALANDRÁN: Danza la mar. Siendo un mozacu tuvi la suerte de ver a esti grupu d’Avilés delles vegaes. Unos grandes músicos que dexaron un par de discos con una montonera de bonos temes, como esta danza. Entemecíen con muncho xeitu’l folk con una especie de pop y teníen un directu bien entreteníu.

DIXEBRA: Nesti Mundu Traidor. Podríen ponese temes a esgaya de Dixebra, banda sonora imprescindible desque yera guah.e… Quedo con esti tema porque ye un estilu un poco distintu, al estilu The Pogues y con una lletra bien prestosa.

AVIENTU / OCHOBRE: Llicenciáu en Barricaes. Un auténticu temazu de los de Riosa, nel que tuvi la suerte de poder participar na grabación del mesmu que fizo Ochobre.

LA TARRANCHA: Somos. La Tarrancha ye pa mi ún de los meyores proyectos musicales qu’esisten n’Asturies… Y esti tema, nuna llinia bien celtic-punk, significa munches coses pa mi… (bones y males!).

INTOLERANCE: Quema Guah.e. El hardcore d’Intolerance flipóme desque los conocí cuando tenía 13 o 14 años… Esti tema ye pura dinamita.

ADIZIÓN ETÍLIKA: Vudú y Santería. Grupu hermanu… Una calidá de la ostia y una cantidá de temazos descomanada… Quedo con esti cantáu pol mio hermanín Carlinos, que me trai bien bones alcordances. Amás, nesti discu tocó’l baxu n’Adizión «El Churi», fináu apocayá… Vaya dende estes llinies la más cariñosa de les alcordances.

RODRIGO CUEVAS: Cómo ye?!. Pa mi un artistazu con mayúscules y, aunque nun ye mui del mio estilu, esti cantar representa folixa y bon rollu. Mólame.

POP PIQUIÑÍN: Tristán. Pop Piquiñín pasó a ser el grupu más sentíu nel mio llar una bona temporada… Infinita calidá musical pa un grupu infantil. Podría escoyer delles, pero ‘Tristán’ cantéla munches vegaes… jejeje.

R.I.P.: Enamorado de la muerte. Pongo esti, pero podría ser cualesquier otru del discu No te muevas… Una auténtica bomba sonora que m’impactó nel so momentu cuando llegó a les mios manes… Pa mi una forma de tocar y unos temes que nun se vieron en nengún otru grupu punk estatal de los 80.

THE CLASH: I fought the law. Anque nun ye un cantar orixinal de The Clash, siempre foi un tema del que me flipó la fuerza que-y meten. Un auténticu himnu. Los discos The Clash y London Calling dos imprescindibles.

LA POLLA RECORDS: No somos nada. El primer grupu punk que sentí, y que lo marcó too. Anque nun foi esti cantar el primeru qu’escuché, sí qu’esti compila un poco munches coses de les que vendríen dempués… ¡punk y gaita!

DROPKICK MURPHYS: Worker´s song. Del álbum Blackout, amiestu de punk con gaita, lletra alrodiu’l proletariáu… Un auténticu cantar “working class”. Dropkick Murphys ún de los mios imprescindibles.

FERMIN MUGURUZA (KORTATU, NEGU GORRIAK): La Línea del Frente. Podría quedame con munchos cantares más del repertoriu de Fermin Muguruza a lo llargo de la so estensa trayectoria… Sobremanera Kortatu (anque tamién Negu Gorriak) dexáronme munchos cantares de referencia…

SEX PISTOLS: No feelings. Cualquier tema del Never Mind The Bollocks… ye parte de la banda sonora de la mio vida. La guitarra y la voz desgañitada d’esta tema flípenme.

CELTAS CORTOS: La Senda del tiempo. Celtas Cortos marcó musicalmente una bona etapa de mio vida… Y esti temazu tráime una infinidá de bones alcordances.

THE POGUES con THE DUBLINERS: The Irish Rober. Esti cantar que descubrí nun compilatoriu cuando tenía 16 años, introducióme al universu The Pogues y Shane MacGowan… Pásame como con munchos de les cantares y grupos que pongo equí… ye esti, pero tienen munchos otros que tamién son especiales.

BARRICADA: No hay tregua. Cuando’l discu doble en directo de Barricada cayó nes mios manos hubo un enantes y un dempués… Pa mi, hasta aquel momentu, Barricada yeren unos jevis que nun me daben más… Nesti discu nun hai una mala… Fícime acérrime siguidor.

EXTREMODURO: Stand By. Pongo esta porque no personal tócame enforma… Pero d’Extremoduro podría poner munches; munchísimes… Fui un gran siguidor d’Extremoduro y anguaño sigo siéndolo de Robe.