Siguen sumándose nueves feches pa poder ver en directo a más bandes de rock n’asturianu. El próximu 17 y 18 d’ochobre va celebrase nos Almacenes Kuivi d’Uviéu l’Aniverfest, festival que festexa los seis años d’existencia de La Raposa, cervecería carbayona y restaurante veganu nel que’l rock, punk y ska n’asturianu ta mui presente y que dende’l 2023 entama un festival col que celebrar cada aniversariu.
Les dos primeres ediciones de la so fiesta de cumpleaños agotaron toles entraes en Lata de Zinc, polo qu’esti añu la organización tresllada l’eventu a los Almacenes Kuivi d’Uviéu y allarga la celebración a dos díes de duración. Va haber un total de diez conciertos y más actividaes por anunciar ente les que s’alcuentren les actuaciones del grupu punk-folk Skontra y de la banda de mecigayu ska La Tarrancha. Les entraes yá tan a la venta na web www.aniverfest.es.
Suscríbite a les nuestres novedaes
