La Bonturné foi la banda ganadora del XVI Premiu Camaretá al Meyor Cantar con ‘Odisea la Nuí’ y va unes selmanes entamaron la xira d’Autores nel Camín, circuitu d’actuaciones en directo per toles fasteres del país que promueve’l gobiernu pa quien gana los premios a la creación cultural n’asturianu. Tres de tocar yá en Villaviciosa y Tinéu, esta selmana continúen los conciertos per Candás (xueves 22 a les 19.30h nel Teatru Prendes) y Cangas del Narcea (vienres 23 a les 20h nel Teatru Toreno). Van siguir llueu Nava (30 de mayu), Avilés (13 de xunu), Cabranes (27 de xunu) y, al marxe d’esti circuitu, la formación bal-folk tamién actúa’l 7 de xunu en Soto Rei y el 27 de xunetu n’Ayer.
«La posibilidá de xirar per toa Asturies, dándomos la ocasión de presentamos ente xente que sinón nun mos veríen enxamás ta siendo una esperiencia gratificante», desplica’l gaiteru y saxofonista Santi Caleya pa valorar la so esperiencia n’Autores nel Camín. El músicu sorraya que’l públicu ta acoyéndolos d’una manera «espectacular n’escenarios mui dignos«, polo qu’algamar el Camaretá supón un emburrión importante pa les formaciones ganadores del certame.
Amás de los conciertos, La Bonturné va grabar a finales de xunu’l videoclip que tamién ta incluyíu nel premiu y que va estrenase en xunetu. Con estes acciones el grupu sigue dándo-y puxu a A Contraforga, l’únicu álbum que tien publicáu hasta la fecha. Grabáu y mezcláu nos Tutu Estudios por Sergio Rodríguez, el discu amuesa’l bon facer d’esta formación que lleva cerca de tres décades compartiendo llabor n’otres agrupaciones como La Viga Travesá, La Bandina les 47, Folkgando, Pauline en la Playa o La Bandina. El trabayu parte del conocimientu bien fondu de la música tradicional y los sos instrumentos, a caballu d’un son prestosu y singular, y apurre un repertoriu amañosu dafechu pal baille, nuna llinia bal-folk tradicional.
Suscríbite a les nuestres novedaes
