La estaya de Cultura del Conceyu de Colunga ta acabante d’anunciar la programación cultural pa tol branu. Dientro de la montonera d’actividaes que va haber, la música n’asturianu va tener presencia con delles actuaciones y ciclos: Cancios de Chigre en Colunga y Llastres; conciertos de La Bonturné, de Les Caparines y de Mapi Quintana; y l’amuesa del Premiu La Busdonga d’Asturianada.
L’axenda arranca colos XXX Alcuentros Cola Cultura Tradicional d’Asturies, ciclu nel que’l conceyu programa actividaes culturales estremaes. Na estaya musical van facese los Cancios de Chigre el xueves 10 de xunetu a les 13h en Colunga, coles actuaciones de Marta Martínez Grande y Luis Estrada, amás d’Iván Tomás Fernández a la gaita; y el domingu 20 de xunetu a les 13h en Llastres con Liliana Castañón y Álvaro Fernández Conde, xunto al gaiteru Alfonso Fernández Álvarez ‘Fonsín de Les Regueres’.
Dientro d’estos alcuentros enmárquense tamién los conciertos de La Bonturné -miércoles 16 de xunetu a les 20.30h nel Parque H Pérez-Cubillas de Colunga- y Les Caparines -xueves 7 d’agostu a les 20h nel Parque H Pérez-Cubillas de Colunga-. Amás, l’Ayuntamientu de Colunga tamién entama’l ciclu de conciertos de branu na cai Musicalle, nel que va cellebrase una actuación de Mapi Quintana y Marco Martínez el sábadu 2 d’agostu nel Paséu de la Ilesia de Llastres.
Pa completar l’axenda esti conceyu tamién va acoyer l’Amuesa del Premiu La Busdonga d’Asturianada, iniciativa del circuitu de la Conseyería de Cultura Autores nel Camín nel que van actuar les intérpretes de canción asturiana ganadores d’esti premiu na so primer edición: Lorena Corripio, Carlos Velasco y Marina Carbajosa, acompañaes pol gaiteru Vicente Prado ‘El Pravianu’. La cita va ser el llunes 11 d’agostu a les 19h nel Paséu de la Ilesia de Llastres.
Suscríbite a les nuestres novedaes
