El pasáu mes el Conceyu de Corvera inauguraba’l so primer muséu y esti ta dedicáu a la música asturiana y a la d’otros territorios del Arcu Atlánticu. Trátase del Muséu de los Países Celtes, una iniciativa de Bras Rodrigo y de la banda gaites que dirixe, la de Corvera d’Asturies, que s’asitia en Villa y que yá pue visitase acutando cita de xueves a domingu n’horariu de mañana. Falamos col gaiteru Bras Rodrigo p’afondar sobre esta iniciativa única.
¿Cuándo y cómo surde la idea de crear esti muséu?
El Muséu de los Países Celtes ye una idea yá antigua; llevamos cuasi 15 años trabayando nello. Yá se ficiera un intentu d’abrir en 2015, fai 10 años, y la verdá ye que nun pudimos echalo arriba porque la financiación que nos prometieren delles empreses al final nun apaeció. Retomámoslu fai unos tres años, gracies al Conceyu de Corvera y a unos fondos europeos que se solicitaron y nos dieron.
«Yá se ficiera un intentu d’abrir en 2015, fai 10 años, y la verdá ye que nun pudimos echalo arriba porque la financiación que nos prometieren delles empreses al final nun apaeció»
¿Por qué y pa qué lu creastis?
La idea ye porque tengo una colección privada mía de muñecos gaiteros y tengo tamién material de gaites. Per otru llau la Banda Gaites de Corvera, que ye una fundación, tamién tenia delles gaites y entamamos a pensar na idea de facer un Muséu de los Países Celtes onde s’amosara por qué somos celtes, diferentes traxes tradicionales de los sitios y la cultura común como ye, por supuesto, la música celta, la mitoloxía, la casa celta y les semeyances que tenemos cuasi dende’l Neolíticu. Creámoslo p’amosar la xermandía celta que nos hermana a les ocho naciones celtes del Arcu Atlánticu.
Delles persones visitando’l muséu
¿Cómo foi’l procesu de creación y qué persones y/o entidaes participaron d’ello?
El procesu de creación foi un trabayu de dellos años, como comenté enantes. Surde dende la Banda de Gaites de Corvera d’Asturias y la idea orixinal foi mía, por lo que te comenté de la colección personal que tengo de muñequinos gaiteros, que tengo más de 500, y que la Banda Gaites de Corvera tien delles gaites y dellos traxes tradicionales.
¿Conoces iniciatives asemeyaes notros países celtes?
La verdá ye que conocemos dellos museos, pero son museos de la gaita o de la cornamusa. Pero un muséu propiu de les naciones celtes, nun hai. Creemos que ye una iniciativa perguapa y que ye pionera nesi sen.
«Nel muséu pueden vese dellos paneles desplicativos, onde hai un panel o dos dedicáu a cada nación celta. Tamién hai paneles de la mitoloxía celta, les construcciones, la música celta… Amás hai un gaiteru de cinco metros nel esterior, una parede viesca y la colección de muñecos gaiteros, instrumentos y traxes tradicionales»
¿Qué material pue vese nel muséu?
Nel muséu pueden vese dellos paneles desplicativos, onde hai un panel o dos dedicáu a cada nación celta; a les ocho: Asturies, Galicia, Isla de Man, Irlanda, Escocia, Gales, Bretaña y Cornualles. Desplica les coses más característiques de cada país celta. Dempués puede vese también dellos paneles desplicativos de la mitoloxía celta común; de les construcciones, o sea lo que ye la casa celta. Y tamién hai paneles dedicaos a la música celta.
Como elementu llamativu, a les afueres del muséu -que ye una escuelina típica d’estes de los años 60-, hai un gaiteru de más de cinco metros que ye un poco lo que más llama la atención; ye onde la xente se fai les semeyes. Tamién hai una parede mui guapa que llamamos la parede viesca, que ye un xardín colgante real, o sea con mofo de verdá, que ye una auténtica pasada.
Amás puede vese lo que comenté enantes: la colección personal mía de muñecos gaiteros, dellos instrumentos como gaita asturiana, gaita gallega, uillean pipes, panderetes, percusión y maniquís con traxes tradicionales de los países celtes.
Una de les sales que formen el muséu corverán
¿Cómo pue visitase?
La visita pel momentu ya concertada. Puede pidise cita na páxina web www.museupaisesceltes.com na qu’hai un corréu al que se pue escribir pa concertar la visita. Pel momentu hai una entrada simbólica de cinco euros pa poder caltener el proyectu.
«Queremos que seya un muséu vivu: queremos facer actividaes sobre manera pal branu; delles presentaciones de llibros que tengan que ver cola temática del muséu; dalgún conciertín y dalguna cosuca más, amás de siguir adquiriendo material y facer afuera una cabana de teitu»
¿Qué espectatives tenéis con él?
La verdá que son grandes porque a la xente ta prestándo-y muncho. Tuvo una acoyida perbona, ye’l primer muséu que tenemos nel Conceyu de Corvera y la verdá que tamos mui contentos. Amás queremos que seya un muséu vivu: queremos facer actividaes sobre manera pal branu; delles presentaciones de llibros que tengan que ver cola temática del muséu; dalgún conciertín y dalguna cosuca más. Y tamién tenemos previsto nel futuru esponer más coses, siguir adquiriendo material y facer afuera una cabana de teitu pa que la xente pueda ver lo que yera una vivienda antigua celta per dientro.
Pa ufrir les meyores esperiencies, usamos tecnoloxíes como les cookies pa poder almacenar y/o acceder a la información del dispositivu. El consentimientu d’estes tecnoloxíes permitirános procesar datos como’l comportamientu de navegación o les identificaciones úniques nesti sitiu. Nun consentir o refugar el consentimientu, pue afectar negativamente a delles característiques y funciones.
Funcional
Siempre activo
El almacenamiento o acceso técnico es estrictamente necesario para el propósito legítimo de permitir el uso de un servicio específico explícitamente solicitado por el abonado o usuario, o con el único propósito de llevar a cabo la transmisión de una comunicación a través de una red de comunicaciones electrónicas.
Preferencias
El almacenamiento o acceso técnico es necesario para la finalidad legítima de almacenar preferencias no solicitadas por el abonado o usuario.
Estadísticas
El almacenamiento o acceso técnico que es utilizado exclusivamente con fines estadísticos.El almacenamiento o acceso técnico que se utiliza exclusivamente con fines estadísticos anónimos. Sin un requerimiento, el cumplimiento voluntario por parte de tu proveedor de servicios de Internet, o los registros adicionales de un tercero, la información almacenada o recuperada sólo para este propósito no se puede utilizar para identificarte.
Marketing
El almacenamiento o acceso técnico es necesario para crear perfiles de usuario para enviar publicidad, o para rastrear al usuario en una web o en varias web con fines de marketing similares.
