El domingu 19 ye’l Día del Pá y La Bonturné van regalar a tolos siguidores de la música asturiana l’adelantu del so esperáu primer discu. «La Punta’l Boquerón» ye’l nome d’esti tema que va abrir A Contraforga, trabayu que va asoleyar esta primavera. La formación comandada por Merce Santos (zanfona), David Varela (acordión y percusión), Santi Caleya (saxu sopranu y gaita) y David Casillas (Contrabaxu) va estrenar el single na canal de YouTube de musicasturiana.com a les diez de la mañana.
«Ye un tema melódicu; un schottish, claru exemplu na nuestra sonoridá tímbrica, con una melodía compuesta por Merce Santos», comenta David Varela sobre «La Punta’l Boquerón». Grabáu y mezcláu nos Tutu Estudios por Sergio Rodríguez, la pieza va amosar el bon facer d’esta formación que lleva cerca de tres décades compartiendo llabor n’otres agrupaciones como La Viga Travesá, La Bandina les 47, Folkgando, Pauline en la Playa o La Bandina.
Suscríbite a les nuestres novedaes
