Yá pue sentise’l cuartu y últimu cenciellu de La Ciudá nel Mar: ‘Siempre llibre’. Nesta ocasión esti cuartetu qu’amesta folk, pop, indie y canción d’autor torna con una tonada mui orixinal mesmo no musical que nel mensaxe. D’esta manera siguen reflexando la so diversidá sonora y complementen a los otres trés singles anteriores -‘Foles ermes‘, ‘Lluminaria‘ y ‘Vuelta‘- nos que caún s’avera a un estilu musical estremáu. La selmana qu’entra va ver la lluz en toles plataformes musicales l’EP completu con estos cuatro temes.
«Esti cantar naz d’una tonada clásica asturiana que se llama ‘Siempre sola’ a la que-y cambié la lletra orixinal porque yera tremendamente desoladora«, desplica Marina Pangua, vocalista, percusionista y lletrista del grupu. Asina ye como la tonada tórnase en ‘Siente llibre’ con un mensaxe «más empoderador y esperanzador«, amás de «feminista«.
Musicalmente’l cantar tamién anueva’l xéneru: «ficimos un arreglu mui especial, porque en cuenta de cantase a la gaita, punximos como bordones de la gaita unes copes de cristal y xunto a los vigulinos dan-y un aire mui llixeru», comenta Pangua. «Toes eses vueltes que da la melodía, les tonaes, la voz… fízose d’una manera qu’acompaña bien al testu» y la banda afirma que-y «prestó muncho» el resultáu.
El próximu vienres 17 Lluminaria, l’EP completu de La Ciudá nel Mar, va tar disponible en toles plataformes musicales. El cuartetu yá ta trabayando en más temes con vistes a poder sacar más material l’añu qu’entra y amás, tán de celebración, porque tán acabante de recibir la noticia qu’algamaron el primer premiu del X Concursu de Maquetes COMA del Ayuntamientu de Xixón, col que reciben un bonu de 1000 € en material musical, 20 hores gratuites de llocal d’ensayu y grabación, mezcla y masterización d’un cantar con videoclip.
Suscríbite a les nuestres novedaes
