Per tercer añu consecutivu, la Conseyería de Cultura, Política Llingüística y Deporte convoca les ayudes a los distintos subsectores de les Industries Culturales y Creatives d’Asturies. Hasta’l 19 de febreru pueden presentase proyectos a les subvenciones pal Desendolcu de proyectos culturales y acciones de formación y movilidá per parte de profesionales y empreses. La convocatoria d’esti añu aporta con dos novedaes que dan respuesta a dalgunes reivindicaciones del sector: convocales a primeros d’añu -en cuenta de nel segundu y tercer trimestre, como venía pasando- y ampliar la dotación presupuestaria, que medra de los 895.296 euros a los 1.186.000 euros.
La partida pal sector de la música ye de 200.000 € (85.000 más que l’añu pasáu) y a esta llinia pueden presentase proyectos de tres tipos: pa la producción d’una obra musical; pa la realización de xires; y pa la organización de festivales y ciclos de música. Dientro de los criterios de valoración tiénense en cuenta aspectos como’l «interés artísticu, calidá y calter innovador del proyectu» (40 puntos), la «presencia de profesionales del Principáu d’Asturies» (10 puntos), o que más del 50% del proyectu seya n’asturianu o eonaviego (5 puntos). Tamién se valoren pa cada tipu de proyectos aspectos concretos como la trayectoria profesional, el númberu d’actuaciones, la perspectiva de xéneru o’l númberu de díes y artistes implicaos nos eventos.
Los proyectos desendolcaos o por desendolcar tienen que facese enantes del 31 d’ochobre de 2025 y xustificase’l 1 de payares. Tola información ta nel BOPA y, amás de la música, hai otres seis llinies d’actuación: artes escéniques, llibru, audiovisual, artes visuales, videoxuegos y formación y profesionalización.
Suscríbite a les nuestres novedaes
