La discografía de Carlos Rubiera yá suena en Spotify

Por fin pue sentise “La Capitana” en Spotify y nes demás plataformes musicales. Esti cantar perconocíu de Carlos Rubiera, xunto a otros 113 que formen la so estensa discografía, tán disponibles dende güei a traviés de más de 60 plataformes dixitales de tol mundu. Son en total seis trabayos discográficos que percuerren la trayectoria dende 1974 hasta anguaño d’esta figura imprescindible del Nuevu Canciu Astur y de la música asturiana .

Carlos Rubiera Tuya entamó a componer en 1974, dándose a conocer al añu siguiente nel marcu de les xornaes de presentación del Nuevu Canciu Astur, cellebraes na Panerona del Pueblu d’Asturies de Xixón. De magar entós, alternó l’actividá lliteraria y musical cola docencia y l’artesanía de la madera, que tien como afición. Comprometíu na defensa de la identidá asturiana, tuvo vinculáu a Conceyu Bable, ye miembru de l’Academia de la Llingua Asturiana, foi presentador de dellos programes de radio y TV n’asturianu rellacionaos cola cultura’l país y, xunto con dellos cantadores de tonada y maestros gaiteros, impulsó la creación de l’Asociación d’Intérpretes de la Canción Asturiana (AICA) y del Conceyu de Gaiteros Asturianos (CGA); partcipando tamién n’otres iniciatives de calter cívicu, políticu y cultural.

Tien actuao per toa Asturies, Berlín, Madrid, Barcelona y xiró per Suiza. Asoleyó una docena de discos en solitario, amás de les collaboraciones en discos colectivos y d’otros artistes, y en 2004 fundó’l so propiu sellu discográficu, Producciones La Capitana, col que publicó la reedición de Viaxe al Silenciu y tamién Carlos Rubiera, 30 años; un doble CD-llibru recopilatoriu de tolos cantares grabaos enantes de Viaxe al Silenciu, desperdigaos en discos de vinilu y CDs con delles discográfiques. Tamién asoleyó con esti sellu Canciones de Xixón, una riestra de cantares llixeros de diversos estilos (tango, bolero, balada, blues, reggae, salsa) colos que remembró los sos oríxenes de cantautor.

Estudiu y difusión de l’asturianada

Nel 2007 grabó y publicó Asturianaes, una llograda aportación a l’anovación del xéneru que más s’identifica cola música asturiana: la tonada de la tierra o asturianada y na que collaboraron pegoyos de la música’l país como Mariluz Cristóbal Caunedo, Xuacu Amieva y Hevia. En 2015 -tres de ser per cuatro años conceyal d’Educación, Cultura y Fiestes de Xixón- llanzó Asturianaes II y en 2021 publicó con Goxe Producciones 30 Asturianaes una gran obra en formatu llibru+3CDs col que pon el ramu a más de venti años d’estudiu, revisión y composición nel ámbitu de la Canción Asturiana, dando como resultáu un trabayu que representa’l cumal de la so carrera como cantante y compositor d’asturianaes; siguiendo la estela de los clásicos, pero cola perspectiva del tiempu actual.

Toa esta discografía ta a la venta en formatu físicu en musicasturiana.com y agora tamién pue disfrutase d’ella per tol mundu gracies a la distribución dixital desendolcada por esti portal dedicáu a la difusión de la música n’asturianu per Internet.

Música de de Carlos Rubiera a la venta na tienda