El Taller de Músicos de Xixón regala’l llibru y doble CD ‘Tres misas de gaita’
En payares de 2019 el Taller de Músicos de la Fundación Municipal d’Educación, Cultura y Universidá Popular de Xixón, creaba la Colección René de Coupaud. Trátase d’una serie de publicaciones dedicaes a documentar, catalogar y caltener el patrimoniu musical asturianu y, sobre manera’l xixonés, cola edición de llibros-CD monográficos dedicaos a compositores, intérpretes o repertorios. ‘Tres misas de gaita. Entre la tradición y la conservación del patrimonio asturiano‘ foi la primer obra qu’editaron, pudiendo algamase tovía un exemplar de baldre contactando al corréu tallerdemusicos.fmc@gijon.es.
Esti llibru de 48 páxines editáu en tapa dura y qu’inclúi un doble CD, asoleyó en collaboración cola Fundación Valdés Salas y ta dedicáu a la misa de gaita, un repertoriu reconocíu como Bien d’Interés Cultural en 2014, nel que s’alcuentren la eucaristía cantada en llatín, con xiros heredaos de la tradición popular, y l’acompañamientu con gaita de fuelle. Los testos son d’Ángel Medina, Catedráticu de Musicoloxía na Universidá d’Uviéu, y nellos analiza y contestualiza a la misa asturiana de gaita, amás d’ufrir la trescripción del testu de la misa.
Nel doble CD pueden sentise tres versiones de mises de gaita na so tradición centro-occidental, más dalgunos exemplos históricos, en versión coral, voz solista femenina y voz solista masculina. Nes grabaciones actuales suenen les voces de Mariluz Cristóbal Caunedo y Pepe’l Molín xunto a les gaites de Llorián García y Xaime Menéndez; mentes que nel rexistru históricu de 1950 pue sentise la voz de Don Ramón y Mino’l Cantor de Selgas coles gaites de Paco Paribañas o’l Gaiteru de La Veiga, y nel de 1994 les voces de Lolo Cornellana, Eduardo Martínez y Pepe’l Molín xunto a la gaita de Manolo Quirós.
Cómo pidir un exemplar de baldre
Esta edición ye gratuita. Pue pidise un exemplar a traviés del corréu tallerdemusicos.fmc@gijon.es, indicando nome, apellíos, teléfonu y corréu electrónicu; y dende’l Taller de Músicos van dexar -hasta que queden esistencies- un exemplar na recepción del Centru de Cultura Antiguu Institutu pa que la persona interesada puea recoyelu n’horariu d’apertura al públicu. Si la persona nun pue dir físicamente, los coordinadores d’esta colección unvíen l’exemplar con una empresa de mensaxería y el destinatariu tien que pagar el coste d’unvíu al recibir l’exemplar.
La Colección René de Coupaud tien un enfoque musicolóxicu y plantega averar la herencia musical asturiana a la ciudadanía a traviés d’ediciones qu’amesten un interés plural por distintos xéneros y estilos musicales. Lleva’l nome de René de Coupaud Villarrubia (1952-2018), figura fundamental pal desendolcu de la vida musical y cultural asturiana como intérprete, compositor, productor y xestor. Amás del ‘Tres misas de gaita. Entre la tradición y la conservación del patrimonio asturiano’, tamién asoleyó llibru con CD+DVD ‘Berto Turulla. Una mirada moderna a la música popular de Asturias‘.
