Ayer inaugura La Gaitona, entama un concursu de tonada y homenaxea a Tina Castañón

El conceyu d’Ayer ta puxando pola pola música asturiana con delles acciones: la inauguración de La Gaitona d’Ayer, una escultura de tres metros n’homenaxe al instrumentu autóctonu más popular d’Asturies, y la creación del Concursu de Música y Toná Valles d’Ayer. Amás, durante la inauguración del monumentu, l’Ayuntamientu rindió homenaxe a l’ayerana Justina Castañón, la primer muyer gaitera asturiana de la qu’hai constancia.

La Gaitona d’Ayer ye una obra del artista ayerán Gonzalo Prado Grela que s’inauguró’l pasáu 5 de marzu en Cabanaquinta. Llevanta un total de cuatro metros -tres de la gaita y ún del pedestal- y fíxose con filos de cobre, denomaos “tiger”, un material que s’usa nes esplotaciones mineres. Mesmamente, l’autor de la obra foi mineru, polo que la minería ta presente enforma en caduna de les sos pieces. L’alcalde, Juan Carlos Iglesias García, consideró que con esta acción, el gobiernu llocal tien la intención de «fomentar la etnografía y el folclor asturianos y, a la par, da-y puxu a un espaciu públicu allugáu nel centru la capital y crear un recursu turísticu».

Dende’l Conceyu aprovecharon la ocasión pa homenaxear póstumamente a Tina Castañón. Nacida en Morea Riba en 1925, entamó a tocar dende guah.a, cuando garraba la gaita de so pá, Vitorín ‘El Gaiteru’, a escondidielles, yá que per aquel tiempu yera un instrumentu consideráu namás pa paisanos. Tina foi la pionera y la qu’abrió camín pa otres munches muyeres. Tamién yera una apasionada de la tonada y con so padre debutó nel concursu que d’aquella organizaba’l periódicu La Región na sala fiestes “Babel” d’Uviéu. Morrió’l 12 de febreru de 2019, a los 93 años d’edá.

Concursu de Música y Toná

Tamién l’Ayuntamientu d’Ayer ta acabante d’anunciar la creación, en collaboración cola Banda Gaites El Gumial, del Concursu de Música y Toná Valles d’Ayer. Ente los principales oxetivos del certame ta’l de puxar pola modalidá de toná ayerana como elementu fundamental de la canción asturiana y, al empar, reconocer y da-y valir al llabor de los intérpretes d’esta tipoloxía de tonada propia del conceyu.

El concursu va cellebrase nel Teatru “Cine Carmen” de Morea y ta organizáu en delles fases. La primera ye la escoyeta de los participantes, que va durar del 5 al 22 de marzu, y na que les persones interesaes pueden apuntase na web www.vallesdealler.com o llamando al Centru Cultural de Morea (985 48 28 85). Una vez escoyíos, van pasar per cuatro rondes d’eliminatories, pa dar pasu a les semifinales y llueu a una única final prevista ente’l 5 y 12 de xunu. El fallu del xuráu va dase a conocer na gala d’entrega de premios, el 19 de xunu.

9.350 euros en premios

Les modalidaes son senior masculín, senior femenín, gaita y tambor, toná allerana y toná infantil. Los ganadores en cada estaya, sacantes la infantil, van recibir un premiu de 1.100 euros y un troféu. Quienes queden en segunda posición van recibir 700 euros y una placa, los terceros 500 euros y una placa, y los clasificaos ente’l cuartu y séptimu puestu 100 euros. La estaya d’infantil va premiase con 100 euros pa les 7 rapacinos clasificaos más una placa o diploma y amás ta prevista la grabación d’un discu coles canciones de los finalistes nes distintes modalidaes.

Mercar discos de gaita y tonada na tienda online