La música tradicional asturiana sigue abriendo caminos y sumando quilómetros al so mapa internacional. Dende’l 19 y hasta’l 31 de xineru, la gaita va sonar n’Arabia Saudí dientro de les Xornaes Culturales Españoles que l’Ithra, ún de los compleyos culturales más relevantes del mundu, organiza col sofitu del Gobiernu saudí y en collaboración col Gobiernu del estáu español.
Na primer fase del viaxe desplazáronse a Arabia trés profesores de la Escuela de Música Tradicional Villa de Xixón: Satur Vega, Xosé Nel Villanueva y José Luis García. El trío ufiertó dos conciertos diarios nel centru cultural Ithra, amosando la bayura y la vitalidá de la tradición gaitera asturiana a públicos de cultures bien estremaes.
«Dende Asturies entiéndese esta participación como una oportunidá única pa poner en valor la música propia»
El momentu más importante va llegar el día 28 de xineru, cola incorporación de tola Banda de Gaites Villa de Xixón a la gala de clausura del programa. Un espectáculu de gran formatu, producíu y xestionáu por Mediapro xunto a otres empreses españoles, onde la música va dialogar con un impresionante despliegue de lluz, drones y pirotecnia. La banda xixonesa va ser la única representante del norte de la península nuna cita que xune tradición y tecnoloxía nun escenariu d’alcance mundial.
«Dende Asturies entiéndese esta participación como una oportunidá única pa poner en valor la música propia y reivindicar el so llugar al mesmu nivel que les tradiciones del sur peninsular, demostrando que la gaita asturiana ye llinguaxe universal cuando suena con personalidá y raigañu», cuenten dende la dirección de la banda. Nun ye un casu aislláu. En menos d’un añu, la Banda de Gaites Villa de Xixón actuó en Nueva York, Portugal, Xapón y agora Arabia Saudí, convirtiéndose nuna de les agrupaciones d’esti tipu con más quilómetros percorríos en tan pocu tiempu.
Enntes d’emprender esti nuevu capítulu internacional, la banda despidióse de Xixón el pasáu sábadu 16 de xineru nel Teatru Xovellanos, compartiendo escenariu col gaiteru gallego Carlos Núñez, nuna cita yá habitual nes xires d’esti referente de la música gallega.
Suscríbite a les nuestres novedaes
