El 29 de payares Puru Remangu y Ixuxú Cultura entamaron Artístiques, un festival pioneru qu’axuntó artes escéniques, música, artes plástiques, mocedá, diversidá llingüística y feminismu. Una de les propuestes qu’actuó dientro de la estaya musical foi la gallega Catuxa Salom, que dio un enérxicu conciertu énte casique 500 persones nel que sonó la música de raigañu del so país xunto a electrónica y ritmos llatinoamericanos. Esti xueves 12 de febreru l’artista vuelve a actuar n’Asturies; va ser nel CMI Pumarín de Xixón-Sur, a les 19h y con entrada de baldre.
Catuxa Salom ye una mestura de ritmos indíxenes arxentinos, música tradicional gallega y bases electróniques enérxiques. Enriba d’un escenariu ufre una esperiencia visual y sonora envolvente, con una puesta n’escena cuidada y la fuercia d’un tríu de percusiones, contrabaxu y sintetizadores.
Esta música nacida en Vilagarcía d’Arousa debutó discográficamente en 2022 col EP Nunha aldea, en 2024 algamó’l Premio Martín Códax na categoría de «Músicas del mundo y mestizaje» y en 2024 llanzó la so primer referencia de llarga duración: Caldo. El so últimu llanzamientu ye ‘Te quedaste fuera’, un cenciellu que comparte xunto a la rapera castellana Bewis de la Rosa. Na so actuación del xueves en Xixón aporta en formatu tríu acompañada por Lucía Cortiñas (percusiones) y Yudit Almeida (baxos, bases, contrabaxu).
Semeya de l’actuación n’Artístiques fecha Nay Semeya.
Suscríbite a les nuestres novedaes
