Arlanzón (Burgos) va acoyer una nueva edición del alcuentru de música tradicional Crisol de Cuerda ente’l 27 de xunetu y el 3 d’agostu. Nesta ocasión, como yá ficieren l’añu pasáu, Silvia Quesada, Lisardo Prieto, Pepín de Muñalén, Alberto Ablanedo y Luis Nicolás van tar ente’l profesoráu p’amosar cantares, baille tradicional, melodíes instrumentales y recursos armónicos y d’acompañamientu al alumnáu del cursu dende la so perspectiva de la música asturiana. Les inscripciones yá tán abiertes na web del eventu.
Dempués de dellos años dedicando l’alcuentru a la tradición musical de Galicia, Euskadi, Cataluña, Bretaña, Irlanda o Suecia, la organización de Crisol de Cuerda decidió qu’Asturies protagonizara la so cabera edición. «Estos últimos años pudimos conocer la riqueza de la música asturiana al traviés d’Alberto Ablanedo, bouzukista de Felpeyu y persona mui querida en Crisol, y tamién por proyectos perinteresantes de divulgación de la música popular de vigulín que tán surdiendo n’Asturies, como les Xornaes del Vigulín de Piloña. Sentímonos mui inspiraos por ellos y pensamos que, agora sí, yera’l momentu de traer Asturies a Crisol de Cuerda», comentaba Irene Portela, vigulinera y integrante de la organización. Esti branu, la presencia asturiana nel claustru va sumase a nomes como Alasdair Fraser y Tatiana Hargreaves -vigulín-, Xosé Liz -flauta y bouzouki- o Quico Pugés -violonchelu-, ente otros.
Suscríbite a les nuestres novedaes
