Y por fin llegó’l día. Inda que na cai taba frío y llovía n’abondo, naide aficionáu a l’asturianada nun dexó d’acudir a ún de los grandes teatros del país, la Llaboral de Xixón, y enllenar la fastera central del patiu butaques (cuasique la metá l’aforu) pa sentir y esfrutar la gran final del II Premiu d’Asturianada Obdulia Álvarez «La Busdonga».
«Nuna gala de dos hores onde xorrecieron calidá y nervios a partes iguales y foi conducida por Esther Fonseca y Miguel Montenegro, el gaiteru Valentín Fuente y el tamboriteru Xuacu Areces entamaben con una ‘Muñeira asturiana‘ que dio pasu a les actuaciones»
Nuna gala de dos hores onde xorrecieron calidá y nervios a partes iguales y foi conducida por Esther Fonseca y Miguel Montenegro, el gaiteru Valentín Fuente y el tamboriteru Xuacu Areces entamaben con una «Muñeira asturiana» que dio pasu a les actuaciones, estremaes nun par de pases onde la xente mozo cantó dos asturianaes por cuatro de les categoríes adultes. Na categoría moza llegaba dende Grau la campeona na pasada edición, Marina Carbajosa, qu’ufrió «En el altu del puertu» y «Yo canto a Peñamellera», onde supo buscar con habilidá l’empaste cola gaita de Fuente, mientres que’l llaniscu Néstor Díaz apurrió con munchu arte enriba l’escenariu les vaqueires «Homenaxe a El Pantusu» y una lletra de nueva creación, «Canto a Llanes», que fizo aplaudir enforma al públicu cola so interpretación.
Na estaya masculina y llegáu dende Lliberdón, les cuatro asturianaes de Manuel Roza fueron «Trenta riales de trachueles» (l’ayerana más conocía que grabare Ataúlfo Lada), una «Vaqueira» xunto’l panderu de Xuacu Areces (una ayalga d’instrumentu con más de cien años), «Les barandielles del puente» (n’estilu «Xuacu de Sama») y «La fiesta de l’asturcón», un cantar con lletra nuevo (tal y como afiten les bases del concursu pa la gala final, en música, lletra o dambes coses) y nesti casu roblada pol recordáu Narciso Fernández Arduengo.
Pela so parte, el cántabru Esteban Verdeja cantó en xeitu vaqueiru «Salí-y moces a bailare» acompañáu al panderu de Paula Prieto Castañón, «Carromateros» (n’estilu «Quin El Pescador») una nueva lletra n’asturianu en «D’un puebliquín escondíu» y la so versión de «Voi pa Llanes», mui averada a la que grabare José González «El Presi» alluendi 1953 xunto’l gaiteru César Ordieres, y que nun desllució magar d’un fallu na microfonía que duró malapenes nunos segundos.
Minutos dempués y yá cola siguiente concursante na estaya femenina enriba l’escenariu, Alicia Villanueva, al pocu d’entamar a cantar «La Zagalina» esi mesmu micrófonu quixo dir pal suelu pero la cantante yerbata supo garrálu con fuercia y cantó tol tiempu con elli na mano, amosando dominiu y fuercia escénica nuna interpretación que-y valió bien d’aplausos y que remató con «La Collaona», unes «Vaqueires» xunto al percusionista maliayu Simón San José y una nueva lletra en «A les muyeres y homes». Esta lletra foi l’asturianada más aplaudía na gala: un alegatu escontra la guerra que sorraya Asturies como tierra d’acoyida pa tol qu’aporte a ella queriéndola bien.
«El llabor llingüísticu de los artistes ye, amás de les cuestiones musicales más centrales, ún de los apartaos valoraos nesti concursu. Da-yos altor lliterariu a los temes y crear dientro d’esti xéneru oral tan arcaicu y vieyu ye tan importante como saber imitar temes los temes con más sonadía del pasáu»
Llueu aportó la campeona na edición 2024, la colunguesa Lorena Corripio, que tuvo tamién a un gran nivel con «Muncho me gusta Cabueñes» (ún de los grandes ésitos del recordáu José Noriega), en xeitu vaqueiru «María si vas al monte» xunto’l panderu de Montse Trabanco, «Despierta bella aldeana» y una lletra de nueva creación, «L’asturianada», un bon exemplu de la calidá y procuru llingüísticu qu’esta intérprete amuesa enriba les tables.
Precisamente’l llabor llingüísticu de los artistes ye, amás de les cuestiones musicales más centrales, ún de los apartaos valoraos nesti concursu. Hai bien de temes qu’entá siendo tradicionales, muestren incongruencies llingüístiques pola mor de circunstancies del pasáu que dexaron buelga nes sos fontes, como la falta d’alfabetización, la toponimia castellanizada y foriata, la censura y/o l’ausencia secular de normes d’escritura pa la música y la llingua. Da-yos altor lliterariu a los temes y crear dientro d’esti xéneru oral tan arcaicu y vieyu ye tan importante como saber imitar temes los temes con más sonadía del pasáu.
«Asina foi que na suma de los puntos algamaos nos apartaos d’actitú escénica, entonación, afinación, emisión vocal, orniamientu, matización, dicción y correición llingüística, a la fin salieron ganadores -de resultes de lo amosao esi día concretu enriba l’escenariu-, Néstor Díaz, Esteban Verdeja y Alicia Villanueva»
Poro, quedó un trabayu minuciosu pal xuráu calificador compuestu por Belén Arboleya, Anabel Santiago y esti que soscribe, Héctor Braga, que tuvimos como secretaria a Laura Marcos Domínguez embaxo la presidencia de Juncal García Velasco, dambes muyeres de la Dirección Xeneral d’Acción Cultural y Normalización Llingüística. Ye importante solliñar que tolos cantores finalistes yá tienen un méritu enorme por algamar a esti «concursu de concursos», y sabemos bien que ye’l xuráu quien tien que dir descontando, afilvanando y xebrando, adulces, lo que se fai de lo que s’espera, lo que ye potestativo de lo que ye de llibre eleición magar que l’arte nun hai con qué medilo, como toos sabemos. Y asina foi que na suma de los puntos algamaos nos apartaos d’actitú escénica, entonación, afinación, emisión vocal, orniamientu, matización, dicción y correición llingüística, a la fin salieron ganadores -de resultes de lo amosao esi día concretu enriba l’escenariu-, Néstor Díaz, Esteban Verdeja y Alicia Villanueva.
Mientres les deliberaciones, el públicu esfrutó coles actuaciones d’Ún de Grao acompañando les sos asturianaes al empar de la guitarra y tamién fizo apaición el campeón de la pasada edición, Carlos Velasco, dándose-y dempués al públicu’l resultáu final, que foi mui aplaudíu (bona señal) y sintiéndose darréu les intervenciones de les autoridaes presentes. En primer llugar, la conseyera Ana Vanessa Gutiérrez dexó convocada la III edición pal añu qu’entra mientres que’l presidente del Principáu, Adrián Barbón, garró la pallabra pa comprometése a solicita-y al Ministeriu de Cultura el nomatu y categoría de premiu «nacional» pa esti concursu. Una perbona noticia y, per otru llau, dalgo perfectamente lóxico porque tamos falando d’un Bien d’Interés Cultural yá sancionáu nel BOE dende’l 2015 que tien fame de proteición y puxu a tolos niveles, tamién institucional.
«Adrián Barbón, garró la pallabra pa comprometése a solicita-y al Ministeriu de Cultura el nomatu y categoría de premiu ‘nacional’ pa esti concursu. Una perbona noticia y, per otru llau, dalgo perfectamente lóxico porque tamos falando d’un Bien d’Interés Cultural»
Con tol auditoriu cantando de pie l’Asturies Patria Querida púnxose’l ramu a la segunda edición d’esti prestixosu concursu entamáu pola Dirección Xeneral d’Acción Cultural y Normalización Llingüística y qu’entamaba vá meses coles semifinales cellebraes en Mieres, Villaviciosa y Uviéu. Esti premiu –el mayor dotáu del xéneru– ufre 6.000€ a les voces campeones (masculina y femenina), 3.000€ pa la estaya moza amás d’unes dietes de 400 € pa cada gaiteru acompañante y 150 € pa caún de los cantantes non premiaos por cada día d’asistencia.
Sicasí, entá queda camín qu’andoliar hasta los 25.000 € del ganaor de la «Lámpara minera» del Cante de les Mines en La Unión (Murcia). Inda que’l flamencu d’Extremadura, Andalucía y Murcia mos saque abonda ventaya (UNESCO mediante), siguiendo’l camín de puxar pola cultura musical de nueso, les industries asturianes siguirán apruciendo como estayes económiques viables, con capacidá d’afitar población y crear empléu. Anguaño hai una conciencia colectiva de remocicar la nuestra identidá que tán sofitando hasta los estamentos más roceanos a ello nel pasáu. Esti Premiu Nacional d’Asturianada «La Busdonga» ye un exemplu perfectu d’ello en malapenes dos años d’historia.
«Anguaño hai una conciencia colectiva de remocicar la nuestra identidá que tán sofitando hasta los estamentos más roceanos a ello nel pasáu. Esti Premiu Nacional d’Asturianada «La Busdonga» ye un exemplu perfectu d’ello en malapenes dos años d’historia»
Esa continuidá depende de nós. De cantar más asturianaes, de quereles, apreciales y enllenar con respetu y procuru los espacios au podemos sentir, de xemes en cuando, esti cantar tan nuestru. Porque ye persabío que nesti mundu la verdá absoluta nun esiste, sinón qu’hai munches verdaes pequeñes y particulares. D’ehí, a lo meyor, pue algamase dalguna una verdá de consensu. Y eso ye l’asturianada: una verdá musical de consensu ente’l pueblu asturianu.
Semeyes esbillaes del portal Actualidad Asturias.
Suscríbite a les nuestres novedaes
