Tres de celebrar el pasáu 5 d’ochobre la primer semifinal nel Auditoriu Teodoro Cuesta de Mieres del Camín, esti domingu Villaviciosa acueye una fase nueva del II Premiu Obdulia Álvarez «La Busdonga» d’Asturianada qu’entama’l gobiernu asturianu. A les doce del mediudía van xubir al escenariu del Teatru Riera seis cantadores pa competir por aportar a la final que se va celebrar el vienres 28 de payares, a les 19h, el Teatru de La Llaboral de Xixón.
Les participantes d’esta semifinal son Lorena Corripio -ganadora na primer edición- y Maribel Morán na estaya femenina; Esteban Verdeja y Manuel Roza na estaya masculina; y Lucía Fernández y Néstor Díaz na estaya moza.
Na primer semifinal compitieron Cristina Sánchez y María Luisa Martínez na categoría femenina; Isaac Sierra y Valentín García na categoría masculina; y Jairo Pérez y Bárbara Riesco na categoría moza. Pa la tercera y última semifinal del 26 d’ochobre del Teatru Filarmónica d’Uviéu van participar Alicia Villanueva y María Latores na categoría femenina; César González y Raúl Díaz na categoría masculina; y Marina Carbajosa y Mario González na categoría moza.
La Conseyería de Cultura, Política Llingüística y Deporte creó en 2024 el Premiu Obdulia Álvarez «La Busdonga» d’Asturianada, una reconocencia destinada a promover y difundir la canción asturiana, una de les manifestaciones culturales más significatives del país que se declaró Bien d’Interés Cultural de calter inmaterial nel 2015.
El certame organízase en tres categoríes: femenina, premiada con 6.000 €; masculina, 6.000 €; y moza, con 3.000 €. Pueden presentase toles persones que quedaren seleccionaes ente les seis meyores clasificaes de los concursos llocales «Ciudá de Llangréu», «Ciudad de Oviedo», «Conceyu Siero», «El Comercio», «Valle del Narcea», «Valles d’Ayer» o «Villa de la Avellana».
Con esti premiu, el gobiernu asturianu busca reconocer y valorar «la tradición tan rica de l’asturianada y el llabor d’aquelles persones que caltienen viva esta forma d’arte», amás de «fomentar l’usu de la llingua asturiana, promoviendo la so normalización y espardimientu al traviés de la música». D’esta forma, el xuráu va evaluar el desempeñu de les persones cantantes teniendo en cuenta criterios como la conducta y actitú escénica, la entonación y afinación, la calidá d’emisión y dicción vocal, la ornamentación y matización; la dificultá y variedá d’estilos y la calidá llingüística. La primer edición ganáronla Lorena Corripio (categoría femenina), Carlos Velasco (masculina) y Marina Carbajosa (moza).
Suscríbite a les nuestres novedaes
