Continúa la programación de conciertos de rock, punk y ska n’asturianu. Esta selmana hai trés eventos na capital del país na que esta escena va tener espaciu enriba d’un escenariu coles actuaciones de Skama la Rede, Skontra y La Tarrancha en dos eventos estremaos.
La primer cita ye esti xueves 16 d’ochobre na sala Estilo. La banda lluanco-candasina-maliaya de ska-punk Skama la Rede va tocar dende les 20h nesti conciertu nel que son la banda convidada de Bad Manners, formación inglesa fundada en 1976 que ye ún de los nomes referenciales del movimientu sonoru de la música ska nomáu two-tone.
D’otra banda, el vienres 17 y sábadu 18 los Kuivi Almacenes acueyen l’Aniverfest, festival que festexa los seis años d’existencia de La Raposa, cervecería carbayona y restaurante veganu nel que’l rock, punk y ska n’asturianu ta mui presente y que dende’l 2023 entama un festival col que celebrar cada aniversariu. Nél van tocar Skontra esti vienres y La Tarrancha esti sábadu xunto a un total d’otres nueve bandes.
Suscríbite a les nuestres novedaes
