Los díes 11 y 12 de setiembre l’Espacio de Culturas NYU, na ciudá estaunidense de Nueva York, va dedicar dos xornaes a la cultura asturiana dientro del eventu Asturias. Territorio de conocimiento y de culturas. La primera d’elles va tar dedicada a la Universidá d’Uviéu y a la lliteratura, mentes que na del vienres 12 van participar l’axitador folclóricu Rodrigo Cuevas y el músicu y escritor Xaime Martínez nun alderique entituláu Música y folclore al pie del llar. Modéralu Raquel López, investigadora del Departamentu d’Historia del Arte y Musicoloxía de la Universidá d’Uviéu y introdúzlo Luke Bowe, especialista n’estudios asturianos.
«Esti programa trai a Nueva York a creadores asturianos actuales, que van amosar la so singularidá y l’enfotu en recuperar el patrimoniu cultural y llingüísticu d’una cultura minorizada y poco conocida, la convivencia innovadora y creativa ente lo llocal y la vocación internacional», despliquen dende la organización d’un eventu que cunta col sofitu del Principáu d’Asturies, l’Institutu Cervantes y la Oficina Cultural del Consuláu Xeneral d’España en Nueva York.
Semeya d’Iván G. Huerta cedida por Nortes, esbillada de la crónica de la presentación de La Xorda en Mieres, xunto a Mapi Quintana.
Suscríbite a les nuestres novedaes
