La capital del conceyu Siero van enllenase esti vienres de cantares populares gracies al XVIII Certame de Cancios de Chigre. L’Asociación Amigos del Roble entama otru añu más esti eventu que tien por llema «Alredor de la sidra, La Pola canta» y nel qu’esti añu van participar doce tertulies que van parar a partir de les 21h per once chigres. Amás va haber un «correchigres» animáu por Anabel Santiago, Néstor Díaz, Alicia Villanueva, Valentín Fuente y Xuacu Areces, que van poner música’l país a la cita.
Les tertulies que van participar son Coro Samartino, Peña Careses (Samartino), Soi Panderetera (Xixón), Ñerbatos (La Pola Siero), Xanísimos (Xixón), Tertulia Argüeles (Argüelles), Santa Apolonia (Pañeda), Tertulia Errante (Comarca de la Sidra), Más Que Tunos (Uviéu), Tertulia Tornabaxu (Uviéu), Tertulia Solvay (Lieres) y la cántabra La Capia. Caúna d’elles va actuar nun chigre estremáu, escoyéndose preferiblemente aquellos onde se puea chumar sidra.
«Formamos esa parte de la cultura que, venceyada a la sidra, cierra tratos, cortexa, celebra l’amistá, cellebra la vida… y que sobre too y en toles ocasiones, canta», despliquen dende l’Asociación Amigos del Roble, entidá que puxó por esti certame hai 18 años «col envís de recuperar l’espíritu de les tertulies que s’entamaben entornu a los mercaos de los martes».
‘Chalaneru’, ‘Xixón del Alma’, ‘Pescadores’, ‘La Mina La Camocha’, ‘Cuando fui a Covadonga’, ‘Asturias de mi querer’… Son dalgunos de los 28 cantares que recueye’l cancioneru coles pieces populares qu’edita la organización del eventu. L’enfotu ye claro: «Que mos atrevamos a entonar les coples populares coles que crecimos, ensin mieu nin reparu pa cantar, namás col oxetivu de disfrutar en xuntanza».
Suscríbite a les nuestres novedaes
