La música asturiana sigue espardiéndose perdayuri. Jose Manuel Tejedor torna a ser embaxador de los sones del país n’Irlanda y Florida, onde va dar un total de seis conciertos ente esti vienres y la primer selmana de setiembre. Ye la primer vegada que va actuar nel prestixosu festival Masters of Tradition entamáu por West Cork Music (Irlanda).
Nel festival irlandés, qu’entamó ayer en Bantry y va desendolcase hasta’l domingu 25, va tocar en tres ocasiones: dos conciertos esti vienres en St. Brendan Church y na biblioteca de Bantry House, y otru más nesti espaciu el domingu pela tarde nel pieslle del Masters of Tradition. «Ye la primer vez que voi al Master of Traditions y ellí voi alcontrame con dalgunos de los meyores intérpretes qu’hai nel panorama del folk, y siempre ye interesante», comenta’l gaiteru.
«En Florida vamos tocar al traviés de la unión qu’hai ente Avilés y San Agustín de la Florida, que va agora 100 años de la rellación ente les dos ciudaes», desplica Jose Manuel Tejedor sobre la xira que va dar nel estáu americanu a primeros de setiembre. Pel momentu, tien confirmada una actuación nel Flager Auditorium el xueves 5, a la que van sumase otres dos. «En Florida yá tuvi varies veces y l’acoyida ye siempre mui bona. Encánta-yos la nuestra música, sienten profundamente la unión ente les nuestres cultures», sentencia’l gaiteru.
Merca los discos de Jose Manuel Tejedor
Suscríbite a les nuestres novedaes
